Foto: Almaty qalasy ákimdiginiń baspasóz qyzmeti
Búginde Almatyda qala ákimdigine qarasty 28 kitaphana bar. Onyń úsheýi táýlik boıy jumys isteıdi. Oqyrmandar úshin barlyq kitaphanalarda qolaıly jaǵdaı jasalǵan atap aıtqanda, kitap qory únemi jańartylyp otyrady, tegin wi-fi jumys isteıdi, kompıýterler ornatylǵan, jańa jumys ústelderi, dıvandar men pýfıkter syndy jıhazben qamtylǵan.
Sonymen qatar birneshe kitaphanada kórý qabileti nashar nemese zaǵıp oqyrmandarǵa arnalǵan Braıl pernetaqtalary da ornatylǵan. Braıl júıesiniń qozǵalmaly núkteleri arqyly zaǵıp oqyrman kitap mátinin saýsaqpen sezip oqı alady. Ol úshin kez kelgen kitaptaǵy mátindi arnaıy qurylǵy arqyly skanerlep, kompıýter ekranyna úlkeıtip shyǵarady. Sondaı-aq mátindi qulaqqappen aýdıo retinde tyńdaýǵa da bolady.
«Biz qalamyzdaǵy zaǵıptar qoǵamymen, sondaı-aq túrli ınklıýzıvti uıymdarmen tyǵyz yntymaqtastyq ornatyp jatyrmyz. Sonymen qatar, balalardyń kitap oqýǵa degen yntasyn arttyrý boıynsha jumystardy belsendi júrgizip kelemiz. Ol úshin tegin til úıirmelerin, geımıfıkasııa elementteri bar túrli is-sharalar uıymdastyramyz, tipti juldyzdar men jazýshylardy shaqyryp, ádebı keshter ótkizemiz. Bizde barlyǵy 140 tegin úıirme bar. Jalpy, qalalyq kitaphanalardyń 95%-y jańǵyrtýdan ótti. Bizdiń árbir kitaphanamyz balalar men eresekter úshin jan-jaqty damý ortalyǵyna aınalǵan. Osynyń arqasynda qalalyq kitaphanalarǵa oqyrmandar jyl saıyn kem degende 3 mıllıon ret kelip-ketedi», dep atap ótti Almaty qalasynyń Ortalyqtandyrylǵan kitaphana júıesiniń dırektory Meıram Bektembaev.
Aıta keterligi, qalanyń ortalyqtandyrylǵan kitaphana júıesiniń kitap qory 1 300 000 danadan asady, onyń 18%-y tolyǵymen sıfrlandyrylǵan. Sonymen qatar kitaptar katalogy OKJ saıtynda ornalastyrylǵan jáne barlyǵyna qoljetimdi. Sondaı-aq qazirgi ýaqytta múmkindigi shekteýli azamattar úshin úıge kitap jetkizý qyzmeti testileýden ótkizilip jatqandyǵy belgili boldy.
Sonymen qatar Almaty kitaphanashylary bıyl Shveısarııa, Germanııa, Japonııa, Ońtústik Koreıa jáne Grýzııanyń jetekshi kitaphanalarynda biliktiligin arttyryp, oqýdan ótken.
«Qala basshysy men mádenıet basqarmasy bizdiń salamyzdy damytýǵa qatysty máselelerge aıtarlyqtaı kóńil bóledi. Ásirese – qyzmetkerlerdiń biliktiligin arttyrý, jumysqa qolaıly jaǵdaı jasaýǵa erekshe mán berip keledi. Biz alǵash ret álemniń jetekshi bilim berý ortalyqtary men kitaphanalarynda oqýǵa múmkindik aldyq. Men ózim Ońtústik Koreıada taǵylymdamadan óttim. Biz Starfıld, Namsan sııaqty áıgili kitaphanalarǵa, sondaı-aq ýnıversıtetter men balalar kitaphanalaryna bardyq. Oqý aıaqtalǵan soń, biz áriptesterimizben alǵan barlyq bilimimizdi ózara saralap, áserlerimiz týraly aıttyq. Shetelde alǵan bilimimiz ben jańa ıdeıalarymyzdy ákimdik qalalyq kitaphanalarǵa engize bastady. Bul rasynda keremet nátıje», dedi Nadejda Ten.
Búginde qalalyq kitaphanalarda avtomattandyrylǵan aqparattyq-kitaphanalyq júıe iske qosylǵan. Bul júıeni engizý arqyly birqatar jańa múmkindikter paıda bolǵan. Máselen, elektrondyq oqyrman bıletin shyǵaryp berý, oqyrmandardyń suranystaryn óńdeý, qajetti ádebıetterdi irikteý, tapsyrys berý jáne rezervteý, kitaptardy avtomattandyrylǵan rejımde berý jáne qaıtarý, kitaphanalyq-aqparattyq tehnologııalardy keshendi avtomattandyrý.
