Foto: gov.kz
Dárister áskerı qyzmetshilerge jeke tárbıe jumysynyń elektrondy kúndeligin paıdalanýdyń jańa ádis-tásilin jan-jaqty úıretedi. Sondaı-aq olar kúndelikti qyzmet atqarý barysynda kezdesetin máseleler men qıyndyqtar týrasynda pikir almasyp, áskerı qyzmetshilerdiń bilim deńgeıi men oqys oqıǵalar kezindegi is-áreketin pysyqtaıdy. Ár máseleniń shyǵý sebebi qaralyp, ony sheshý joldary usynylady. Budan keıin dáris saıyn áskerıler óz usynystary men oılaryn ortaǵa salady.
«Kesheli beri tájirıbelik sabaqtarǵa qatysyp jatyrmyz. Onyń barysynda normatıvtik-quqyqtyq aktilerdegi ózgerister men áskerı qyzmetshilerdiń tárbıesine qatysty zańnamalardaǵy jańashyldyqtar túsindirildi. Budan bólek, ártúrli áskerı bólimderden jınalǵan mamandar bir-birimen tájirıbe almasty. Jas jaýyngerlerdi tárbıeleý barysynda qoldanylatyn jańa ádistemeler men tyń tásilder de úıretildi. Mundaı oqý-tájirıbelik jumystary óskeleń urpaqty jáne ásker qatarynda júrgen sarbazdardy patrıottyqqa baýlyp júrgen tárbıeshi ofıserlerdiń biliktiligin nyǵaıtýǵa septigin tıgizedi», deıdi 5573 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary Tımýr Rahımov.
Jıyn kezinde ulandyq áskerıler Dolınka kentindegi saıası qýǵyn-súrgin qurbandarynyń KarLAG mýzeıine ekskýrsııa jasady. Ondaǵy tarıhı derektermen, jádigerlermen tanysty. Odan keıin 6505 áskerı bóliminiń 2-atqyshtar batalonyna at basyn tiredi. Mundaǵy rota komandırleri óz tájirıbelerindegi jaýyngerlik qyzmetke kiriser aldynda jáne ony oryndaý kezeńinde jeke qurammen tárbıe jumysyn júrgizý barysyn kórsetti. Kórneki sabaqqa qatysqan ofıserler óz pikirlerin de bildirdi.
«Kórneki sabaqta qaraýyl qyzmetine jaýyngerlerdi attandyrmas buryn uıymdastyrylatyn tárbıelik jumystar kórsetildi. Kórgenimizdi ózimizde júrgiziletin jumys sapasymen salystyrdyq. Mundaı sabaqtar arqyly biz jumys barysyndaǵy kemshilikterimiz ben artyqshylyqtarǵa kóz jetkize alamyz. Oqý-ádistemelik jıynynyń bizge berer bir paıdasy da osy», deıdi 5513 áskerı bólimi komandıriniń orynbasary Baýyrjan Qanseıitov.
Pikir almasý formatynda uıymdastyrylǵan sabaqtar Dolınka kentinde ornalasqan batalonnyń jaýyngerlik qyzmettegi úzdik áskerı qyzmetshilerin ulyqtaý keshimen aıaqtaldy. Eki kún boıy úzdiksiz sabaqqa qatysqan áskerı qyzmetshiler sarbazdarmen birge ásem án men kórkem bıge elitip, rýhanı demalyp qaldy. Alaıda bul is-shara jıyn qatysýshylaryna demalys syılaý úshin ǵana usynylǵan joq. Munyń basty sebebin Ulttyq ulan bas qolbasshylyǵynyń Tárbıe jáne áleýmettik-quqyqtyq jumystar Bas basqarmasynyń basshysy Nurbaı Bektursynov túsindirdi. Batalonnyń jeke quramyna Ishki ister mınıstriniń orynbasary – Ulttyq ulannyń bas qolbasshysy Erkin Botaqanov pen áskerdiń bas tárbıeshisi Qaırat Úmbetovtiń alǵysyn jetkizgen ol: «Búginde quqyqtyq tártip áskerine jaýyngerlik qyzmetti asqan jaýapkershilikpen atqarý mindeti júktelgen. Al jaýyngerlik qyzmettiń alǵy shebinde sarbazdar men kelisimshart boıynsha áskerı qyzmetshiler júr. Sizder – Ulttyq ulannyń abyroıysyzdar. Sondyqtan da búgingi ulyqtaý sharasynda jaýyngerlik qyzmetti adal atqaryp júrgen úzdikter marapattaldy. Al ádistemelik jıynǵa qatysýshylar osyndaı baǵdarlamalardy ótkizý barysyn bir-birinen úırengenderi abzal», dedi.
Ic-shara máresine jetkennen keıin de qatysýshylar arasyndaǵy ózara pikirtalas jalǵasyn tapty.
