Aksııa aıasynda sý qoımalaryn, aýyldar men qalalardyń aýmaqtaryn tazartý, qoqys jınaý jáne suryptaý jumystary ǵana emes, Qazaqstannyń tarıhı, mádenı, tabıǵı jáne tarıhı eskertkishteriniń jaǵdaıyna qoǵam nazaryn aýdarý da kózdelip otyr.
Tarıhı eskertkishterdi saqtaý máselelerine qoǵam nazaryn aýdarý jáne jalpy tarıhymyzǵa, mádenıetimizge, tabıǵatymyzǵa jaýapty kózqaras qalyptastyrý maqsatynda partııa músheleri men «Jastar rýhy» jastar qanatynyń ókilderi ulttyq mura nysandaryn qoqystan tazartýǵa kiristi. Máselen, Aqtóbe oblysynda partııa músheleri XIX ǵasyrdyń 30-jyldaryndaǵy halyq kóterilisiniń kóshbasshysy, ult batyry Isataı Taımanuly kesenesiniń aınalasynda tazartý jumystaryn uıymdastyrdy. Al Jambyl oblysynda partııa belsendileri IýNESKO-nyń Búkilálemdik muralar tizimine engen biregeı eskertkish – Aqyrtas qalashyǵyn retke keltirdi. Jambyl aýdandyq fılıalynyń tóraǵasy Talap Ábdibekov atap ótkendeı, Aqyrtas – bul tek elimizdiń emes, shetelden keletin týrısterdiń de zııarat etetin orny.
«Jumysty bastamas buryn volonterler mýzeı-qoryq qyzmetkerlerinen qajetti nusqaýlyqtan ótti. Biz aýmaqty jınap, arheologııalyq keshenniń qyzmetkerlerine kómek kórsetemiz. Bul – jas belsendilerimiz úshin týǵan ólke tarıhyn oqýlyqtan oqyp qana qoımaı, sol jerde ejelgi rýhty seziný arqyly tereńirek bilýge múmkindik. Aksııa otandastarymyzdy ortaq qundylyqtar tóńireginde biriktiretinine senimdimin», dedi ol.
Batys Qazaqstan oblysynyń Terekti aýdanynda partııa músheleri «Taqsaı hanshaıymy» kesenesiniń aýmaǵynda tazalaý jumystaryn júrgizdi. Belsendiler kesene aınalasyn aram shópten tazartyp, shamamen 2 tonna qoqys jınady. Munda 2012 jyly arheologııalyq jumystar kezinde «Taqsaı qorǵandar kesheni» dep atalǵan tórt qorǵannan turatyn keshen tabylǵan. Bul sarmat dáýirindegi aqsúıek áıeldiń beıiti – «Altyn hanshaıym».
«Eskertkish oblys turǵyndary úshin ǵana emes, búkil respýblıka úshin mańyzdy. Munda shamamen 1 myńǵa jýyq qundy tarıhı artefakti tabylǵan. Bul jerge týrısterden bólek, oqýshylar men stýdentterge ashyq aspan astynda ekskýrsııalar men tarıh sabaqtary ótkiziledi», dedi partııanyń Terekti aýdandyq fılıalynyń atqarýshy hatshysy Mırhat Ibraev.
Qaraǵandy oblysynda partııa músheleri Shahtınsk qalasynyń janyndaǵy Dolınka kentinde ornalasqan saıası qýǵyn-súrgin qurbandaryn eske alý mýzeıinde boldy. «Amanat» partııasy Shahtınsk qalalyq fılıalynyń tóraǵasy Ǵalymtaı Qarjasov mundaǵy tarıhı qundylyqtardy bolashaq urpaqqa amanat etý qajettigin atap ótti. Partııa músheleri, «Jastar rýhy» belsendileri jáne jergilikti turǵyndardan qurylǵan top mýzeı aýmaǵyndaǵy eskertkishterdi jýyp, qorshaýlardy usaq jóndeýden ótkizdi.
«Taza beısenbi» aksııasyna basqa aımaqtar da qatysty. Atap aıtqanda, Aqmola, Atyraý, Soltústik Qazaqstan, Mańǵystaý oblystary jáne Shymkent qalasynyń partııa músheleri Ekinshi dúnıejúzilik soǵys ardagerlerine arnalǵan eskertkishterdi tazalaýǵa atsalyssa, Qyzylorda oblysy Baıqońyr qalasynda belsendiler «Ǵylym jáne ǵarysh» monýmenti aınalasyn retke keltirdi. Al Almaty qalasynda «Medeý» saıabaǵyndaǵy qoqys jınaldy. Dál osyndaı ıgi ister basqa da eldi mekenderde ótti.
«Taza beısenbi» aksııasy bastalǵaly beri tabıǵatqa jáne ekologııaǵa beıjaı qaramaıtyn 45 myńǵa jýyq partııa múshesi men volonter is-sharaǵa belsene qatysyp, elimiz boıynsha shamamen 6 myń tonna qoqys jınaldy. Partııa músheleri elimizdiń túkpir-túkpirinde myńǵa jýyq ýchaskeni retke keltirdi, bul – orman alqaptary, óndiristik aımaqtar, jol boıyndaǵy aýmaqtar, turǵyn aýdandar. Sondaı-aq 100-den astam ózen, kól, sý qoımasy men sý aıdynynyń arnalary qoqystan tazartyldy.
Mundaı tazartý jumystaryn partııa músheleri ár beısenbi saıyn júrgizedi. Bul rette ár ýchaskege máslıhat depýtattary, belsendiler, bastaýysh partııa uıymdarynyń basshylary bekitilgen. Olar sol aýmaqtarda tártip pen tazalyqty saqtaýdy qamtamasyz etedi, sondaı-aq qoqys jáshikterin ornatý, aýmaqtardy kógaldandyrý, joldardy jóndeý sııaqty ınfraqurylymdy jaqsartý jáne damytý máselelerin sheshedi.
