On besten astam álemdik marapatqa ıe bolyp, tájirıbeli synshylardyń baǵasyn alǵan týyndyny Mádenıet jáne aqparat mınıstrliginiń, Ulttyq kıno ortalyǵynyń qoldaýymen «Golden Man Media» kompanııasy jaryqqa shyǵarǵan.
Aq pen qarasy qatar órilgen ómirde túrli taǵdyr bar. Kınonyń aty aıtyp turǵandaı, munda da taǵdyrdyń tálkegine ushyraǵan qany bir baýyrlardyń ómiri sýretteledi. Jan júregińdi shymyrlatatyn kartına ózgermeıtin týystyq, baýyrlyq, otbasylyq kózqarasty, joǵalǵan meıirimdi izdeıdi. Jaýapsyz ata-ananyń kinásinen qatal taǵdyr ár jaǵaǵa laqtyrǵan jasóspirimderdiń «baýyrym, qanym» degen qajyr-qaıraty tańǵaldyrady. Jan-jaqqa tarydaı shashylǵan otbasy... ákesin izdegen bala... jarymjan júrek...úmit jolynda adasqan taǵdyr...jasalǵan qylmys. Jas rejısserdiń debıýttik kartınasy qoǵamdaǵy osyndaı shıyrlanǵan shytyrman oqıǵalardy sýretteıdi.
Iá, jańa týyndyda Balalar úıinen shyqqan jasóspirimniń basynan keshken qıyndyqtary baıandalady. Kútpegen jerden týǵan baýyryn tapqandaǵy qýanyshy áserli beınelengen. Bul kezdesý aǵaıyndylardyń birigip, ákesin izdeýimen jalǵasady. Qolynda – bir sýret pen ákesiniń aty-jóni ǵana. Jolda – shym-shytyryq oqıǵa, talaıly jol. Eki baýyrdyń izdegeni – meıirim, olar da jaqsylyqtan, jaqsy ómirden úmit kútti. Osy bir úmit, kózderindegi jaryq qııa joldan ótkizdi. Qoldaryn da bylǵatty. Shekarany jaıaý asyp jetti. Alaıda jaqsy ómirge jetektegen úmit bir-aq sátte kek pen qylmysqa aınaldy.
Fılm rejısseri týyndy arqyly baýyrlyq sezimdi kórsetkisi kelgenin aıtady.
«Men úshin kıno – aına. Ol aınadan ózimizdi, qoǵamdy kóre alamyz. Bul kınonyń negizgi ıdeıasy – baýyrlyq baılanys. Aǵaıyndylar bir-biri úshin qandaı isterge, qandaı táýekelge bara alatynyn kórsetkim keldi. Sondaı ystyq, sondaı bekem, sondaı bıik baýyrlyq sezimdi ekrandaý burynnan oıymda júrdi. Sáti de tústi», deıdi rejısser.
Sondaı-aq ol aldaǵy josparyn da atap ótti.
«Aǵaıyndylar» pandemııaǵa baılanysty irkilip qaldy. Keıin festıvalderge usynyldy. Odan beri eki fılm túsirdim. «Jaza» – ómirde bolǵan oqıǵanyń jelisinde túsirildi. Taqyryby – jemqorlyq, paraqorlyq. Budan bólek «Sheker» serıalynyń tolyqmetrajdy nusqasyn jasadym», dedi ol.
«Men úshin kópshiliktiń bergen baǵasy mańyzdy. О́ıtkeni kınony, eń aldymen qazaq kórermeni úshin túsiremin. Al festıval qosymsha marapat, qoldaý deýge bolady. Osy kınoda basty róldi somdaǵan eki akterimiz «Úzdik debıýt» atalymy boıynsha «Azııa Oskaryn» jeńip aldy. Kastıngke kelgende eki jigit te stýdent edi. Buǵan deıin kınoǵa túspegen. Soǵan qaramastan, basty róldi senip tapsyrdym. Kórip turǵandaryńyzdaı, úmitimdi aqtady», deıdi Darhan Tólegenov.
Kınokartınada Dýlyǵa Aqmolda, Álisher Ismaılov, Aıbar Saly, Azat Jumadil, Janel Maqajan basqa da akterler oınaıdy. Túsirilim jumystary Aqtaý qalasynda ótken. Oǵan bas-aıaǵy eki aı ýaqyt ketken.
Sondaı-aq tusaýkeser barysynda sóz alǵan «Ulttyq kınony qoldaý memlekettik ortalyǵy» AQ basqarma tóraǵasynyń keńesshisi Zarına Baıanova aldaǵy jaryqqa shyǵatyn týyndylar týraly aıtty.
«Otandyq kınematografııany damytý kerek. Kórermen komedııa janryndaǵy týyndylardy ǵana emes, avtorlyq kınony da joǵary baǵalaıdy. Barlyq jastaǵy kórermendi otandyq sapaly týyndymen qamtý mańyzdy. Sondyqtan jyl sońyna deıin taǵy birneshe kınony jaryqqa shyǵaramyz. Jalpy, 18 joba boıynsha jumys júrip jatyr», dedi ol.
Aıta keteıik, fılm 22 tamyzdan bastap elimizdiń barlyq kınoteatrynda kórsetiledi.
