Oqý-aǵartý mınıstrligi habarlaǵandaı, elimizde balalardy mektepter arasynda aýystyrý boıynsha memlekettik qyzmet avtomattandyryldy. Osyǵan oraı eGov.kz portalyndaǵy «Bilim» bóliminde turǵylyqty jeri boıynsha nemese odan tys jerlerde kórsetilgen kez kelgen bilim uıymyn tańdaý múmkindigi beriledi.
Jańa úderis esepten shyǵarý jáne bekitý talondaryn, sondaı-aq jeke is qujattaryn tapsyrýdy qajet etpeıdi. Mektep tańdaǵan kezde oqý tili de kórsetiledi. Sondaı-aq ótinish berýshiniń ótinimdi qaıtaryp alýǵa múmkindigi bar.
Bul memlekettik qyzmetti alý úshin aldymen eGov.kz portalynda tirkelip, «Bilim» bólimine ótý kerek. Sodan soń «Orta bilim» bóliminde «Balalardy mektepten mektepke aýystyrý úshin qujattardy qabyldaý» memlekettik qyzmetin tańdap, qajetti joldardy toltyrý jáne elektrondy sıfrlyq qoltańba kómegimen ótinishke qol qoıý qajet. Qyzmet nátıjesimen «Jeke kabınette» tanysýǵa bolady.
Jańa memlekettik qyzmet túrin Oqý-aǵartý mınıstrligi men Sıfrlyq damý, ınnovasııalar jáne aeroǵarysh ónerkásibi mınıstrligi, «Ahmet Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵy» aksıonerlik qoǵamy jáne «Ulttyq aqparattyq tehnologııalar» aksıonerlik qoǵamy birlesip ázirledi.
