Jańasemeı aýdany – bıyl jeke aýdan bolyp qaıta qurylyp, jergilikti halyqtyń mereıin asyrǵan jańa aýdandardyń biri. О́ńirge áleýmettik ınvestısııalardy tartýdyń mańyzy zor. Sondyqtan Shúlbide ashylǵan sport nysanyna halyq dán rıza. Kópfýnksıonaldy nysan aýa-tirek qurylymynda salynǵan. 1,6 myń sharshy metrge shaqtalǵan keshende voleıbol, shaǵyn fýtbol, boks, kúres, ústel tennısi, jeńil atletıkamen aınalysýǵa jaǵdaı jasalǵan. Barlyq qajetti qural-jabdyq bar. Aldaǵy ýaqytta munda sport seksııalary ashylady. Nysan qurylysy «Samuryq-Qazyna» AQ kompanııalary toby atynan biryńǵaı qaıyrymdylyq operatory «Samruk-Kazyna Trust» qory arqyly qarjylandyryldy.
«Samuryq-Qazyna» qorynyń basqarma tóraǵasy Nurlan Jaqypovtyń aıtýynsha, qor kópshilik arasynda salamatty ómir saltyn nasıhattap, korporatıvtik áleýmettik jaýapkershilik aıasynda aýyldyq jerlerge áleýmettik jobalardy júzege asyryp keledi.
«Men ózim de sportpen aınalysqandy unatamyn jáne túrli marafondarǵa belsendi qatysamyn. Máselen, bıyl maýsymda qor qaıyrymdylyq marafonyn uıymdastyrdy. Jınalǵan qarajatqa kelesi aptada Bilim kúnine oraı Astanada ınklıýzııa synyptaryn ashamyz. Sport nysany salynǵan Shúlbi aýylynan bolashaq olımpıada chempıondary shyǵýy múmkin. Bul sport kesheni jastardyń talantyn ashyp, bıikterden kórinýge múmkindik beredi dep senemin», dep atap ótti qor basshysy.
О́z kezeginde oblys ákiminiń orynbasary Jasulan Sársebaev óńirdiń sport ınfraqurylymynyń damýyna qosqan úlesi úshin «Samuryq-Qazyna» qoryna alǵysyn bildirdi. Jaqynda respýblıkalyq marafon jarysynan júldemen oralǵan 13 jastaǵy Azamat Bazarbekov te sport kesheniniń ashylǵanyna dán rıza.
«Jaqynda Parıjde bolǵan Olımpıadadan keıin biz de Eldos Smetov, Demeý Jadyraev, Narıman Qurbanov sııaqty chempıon bolyp, elimizdiń namysyn qorǵaǵymyz keledi. Aýylda talantty balalar kóp. Sondyqtan sport keshenin salyp bergen aǵalarymyzǵa rahmet», deıdi jas sportshy.
Aıta ketsek, qordyń biryńǵaı qaıyrymdylyq operatory «Samruk-Kazyna Trust» arqyly óńirlerde sport ınfraqurylymyn damytý aıasynda 10 aýa-tirek qurylymyndaǵy keshen jáne 1 deneshynyqtyrý-saýyqtyrý kesheni jáne 28 ámbebap sport alańy salyndy.
Sonymen qatar «Samuryq-Qazyna» AQ basqarma tóraǵasy Nurlan Jaqypov shyǵys aımaqtaǵy Shúlbi GES-te arnaıy boldy. Atalǵan stansııanyń ekinshi kezegin salý jobasynyń iske asý barysymen egjeı-tegjeı tanysty.
Nurlan Jaqypov stansııadaǵy jumystardyń joǵary deńgeıinde júrgizilip jatqanyn atap ótti. – Usynylǵan jobalardyń barlyǵy óte mańyzdy. Sondyqtan olardy qysqa merzimde júzege asyrý úshin barlyq sharany qabyldaý qajet. Bul rette jobalardyń ótelýi, qajetti tarıftermen qamtamasyz etilýi mańyzdy. Jobalardyń iske asyrylýyn turaqty baqylap otyrý qajet, – dep atap ótti Qor basshysy. Qýaty 702 MVt bolatyn Abaı oblysyndaǵy Shúlbi GES Ertis ózeniniń boıynda ornalasqan. Bul – Ertis GES kaskadyndaǵy úshinshi stansııa. Qýaty boıynsha Qazaqstandaǵy eń iri stansııa sanalady. Qazirgi tańda Shúlbi GES qýatyn 1050 MVt-qa deıin ulǵaıtýdy kózdeıtin joba iske asyrylýda. Bul elektr energııasyn óndirýdi 40%-ǵa arttyrýǵa múmkindik beretin bolady.
