О́tken aptada AQSh-tyń ashyq birinshiliginiń irikteý týrnırin tamashaladyq. TOP tennısshilerdiń qataryna enbegender ózara sheberlik baıqasyp, jarystyń negizi bóliginde óner kórsetýge kimderdiń laıyq ekenin anyqtady. Bul básekelerde elimizdiń birneshe oıynshysy baq synady. О́kinishke qaraı, tusaýkeser kezdesýlerinde Mıhaıl Kýkýshkın men Dmıtrıı Popko argentınalyq Marko Trýngellıtı men Tıago Agýstınge, Zarına Dııas qytaılyq Ma Esınge jol berdi. Denıs Evseev alǵashqy aınalymda ekvadorlyq Alvaro Gılen Mesany utqanymen, ile-shala nıderlandyq Iesper de Iongke ese jiberdi. Tımofeı Skatov pen Beıbit Juqaev ta jarysty sátti bastady. Alǵashqysy Argentınanyń taǵy bir ókili Fakýndo Bagnısten basym tússe, ekinshisi shveısarııalyq Mark-Andrea Hıýslerge shań qaptyrdy. Sodan qos jerlesimiz bir-birine qarsy oınady. Bul derbı Skatovtyń paıdasyna sheshildi. Sheshýshi saıysta ulybrıtanııalyq Bıllı Harrısti qapy qaldyrǵan ol basty dodada kúsh synasý qurmetine ıe boldy.
Al álemdik reıtıngte joǵary satylarǵa jaıǵasqan tórt tennısshimiz US Open týrnırine esh alańsyz daıarlandy. Jarystyń alǵashqy kúni eki oıynshymyz kortqa shyqty. Aleksandr Býblık (№27) Szıýnchen Shanmen (№72) kezdesti. Osyndaı dúbirli dodaǵa alǵash ret qatysyp otyrǵanyna qaramastan, qytaılyqtyń qarqyny kúshti boldy. Bes settik básekede Shan 6:4, 3:6, 5:7, 6:3, 6:4 esebimen basym tústi. Kóp keshikpeı Aleksandr Shevchenko (№61) men germanııalyq Domınık Kepfer (№80) kúsh synasty. Bul kezdesýde jerlesimizdiń ústemdigi esh kúmán týǵyzǵan joq – 6:3, 7:5, 5:7, 6:2. Endi Shevchenko amerıkalyq Frensıs Tıafomen (№20) sheberlik baıqasady.
Elena Rybakına (álemniń № 4 raketkasy) aýstralııalyq Destanı Aıavany (№180) ońaı eńserdi – 6:1, 7:6. Ekinshi kezeńde Elena fransııalyq Djessıka Ponsheniń (№143) áleýetin baıqap kóredi. Iýlııa Pýtınseva (№32) chehııalyq Lında Noskovadan (№25) basym tústi – 7:6, 6:4. Jerlesimizdiń kelesi qarsylasy – qytaılyq Van Sınıý (№40). Irikteý synynan irkilmeı ótken Tımofeı Skatov (№188) birden óte myqty qarsylasqa tap boldy. Tusaýkeser kezdesýin ol álemniń jetinshi raketkasy Hýbert Hýrkachqa qarsy ótkizedi. Birinshi sette Polshanyń dúldúli 6:3 esebimen jeńiske jetse, qalǵan ekeýi taı-breıke deıin ulasty. Desek te azýly tennısshige otandasymyzdyń áli jetpedi – 7:6, 7:6.
