Máýlen Áshimbaev paralımpıadashylarmen kezdesýde jeńis jolynda tabandylyq tanytyp, dúbirli dodaǵa joldama jeńip alýdyń ózi úlken jetistik ekenin aıtyp, atletterge alǵys bildirdi. Qazaqstan bochcha federasııasynyń prezıdenti parasportshylardyń erik-jigeri men qajyr-qaıraty jas býyn úshin qashanda úlgi bolatynyn atap ótti. Sondaı-aq ol Qazaqstanda erekshe qajettiligi bar azamattardy qoldaýǵa basa mán berilip otyrǵanyna nazar aýdardy. Memleket basshysy Qasym-Jomart Toqaevtyń tapsyrmasymen bul baǵytta júıeli jumys júrgizilip keledi. Sonyń aıasynda Astanada paralımpıadalyq jattyǵý ortalyǵy salyndy. Elimizdiń barlyq óńirinde arnaıy sport klýbtary men mektepter jumys isteıdi. Osyndaı ıgi istiń nátıjesinde qazirgi tańda ulttyq paralımpıadalyq quramaǵa múshe sportshylar qatary myńǵa jýyqtady. Paralımpıada joldamalarynyń sany da turaqty túrde artyp keledi. Al elde parasportpen aınalysatyn azamattardyń jalpy sany 60 myńǵa jetti.
«Prezıdent Qasym-Jomart Toqaev sizderge jyly lebizi men sálemin joldady. Qazirgi tańda Memleket basshysy júrgizip otyrǵan saıasat aıasynda parasportshylardy qoldaý baǵytynda aýqymdy jumys atqarylyp keledi. Paralımpıada oıyndary – jaı jarys qana emes. Bul jerde qaısar rýh, qajymas qaırat jáne muqalmas jiger saltanat qurady. Sizder tabandylyq pen tózimdilik tanytý arqyly tosqaýyldar sanamyzda ǵana bolatynyn, ózine senimdi, kózdegen maqsatqa jetý jolynda aıanbaı ter tógetinder úshin eshqandaı kedergi joq ekenin dáleldedińizder. Túrli synaqty eńserip, úlken nátıjelerge qol jetkizgen sizderdiń árqaısyńyz – biz úshin naǵyz chempıonsyzdar. Ulttyq quramamyz Parıj paralımpıadasyna 33 joldama jeńip aldy. Bul – búkil jattyqtyrýshylar shtabynyń da eseli eńbeginiń jemisi. Alǵash ret parakanoe men para ústel tennısinen joldamaǵa ıe boldyq. Munyń ózi jattyqtyrýshylardyń tabandylyǵy men kásibı biliktiliginiń aıqyn dáleli ekeni sózsiz. Qazir otbasylaryń jáne dostaryńmen birge sizderge barsha qazaqstandyq tilekshi bolyp otyr. Búkil Qazaq eli sizderge jankúıer. Sondyqtan namysty qoldan bermeı, jeńiske jetesizder dep senemiz. Barshańyzǵa sáttilik tileımiz. Parıj tórinde kók baıraǵymyz bıikte jelbiresin!», dedi Máýlen Áshimbaev.
Halyqaralyq bochcha sport federasııasynyń prezıdenti Djon Morganmen kezdesýde Máýlen Áshimbaev halyqaralyq jáne qazaqstandyq bochcha federasııalarynyń yntymaqtastyǵyn nyǵaıtý bolashaǵyna toqtaldy. Sondaı-aq suhbat kezinde kelesi jyly Astanada ótetin bochchadan halyqaralyq jarystardyń mańyzy sóz boldy. Bul dodalar irikteý saıysy ekenin atap ótken jón. Sondyqtan oǵan qatysqan sportshylardyń nátıjeleri álemdik reıtıngte kórsetiledi.
«Bizdiń Halyqaralyq bochcha sport federasııasymen yntymaqtastyǵymyz Qazaqstanda atalǵan paralımpıadalyq sportty damytý jolynda aıryqsha mańyzǵa ıe. Osy rette Astanada World Boccia Challenger 2025 chempıonatyn ótkizýge qoldaý kórsetkeni úshin Halyqaralyq bochcha sport federasııasyna alǵysymyzdy bildiremiz. Mundaı jarys bizdiń elde ǵana emes, sondaı-aq Ortalyq Azııada bochchany damytýǵa jáne ınklıýzııa qundylyqtaryn dáripteýge yqpal etetini anyq», dedi Máýlen Áshimbaev.
Sonymen qatar Senat tóraǵasy bochchamen shuǵyldanatyn otandyq sportshylardyń jetistikterin tilge tıek etip, Federasııanyń aldaǵy jylǵa arnalǵan josparyna toqtaldy. Atap aıtqanda, Qazaqstan bochcha federasııasynyń 2021 jyly qurylǵany, qazirgi tańda 10 óńirlik fılıal jumys isteıtini sóz boldy. Búginde bochchadan ulttyq quramada 41 sportshy bar. Olar – halyqaralyq jarystarda sátti óner kórsetip júrgen atletter.
Djon Morgan Qazaqstan federasııasy atqaryp otyrǵan aýqymdy jumystyń tıimdiligine nazar aýdaryp, yntymaqtastyqty odan ári nyǵaıtýǵa daıyn ekenin jetkizdi.
Sondaı-aq osy kúni Máýlen Áshimbaev Azııa paralımpıada komıtetiniń prezıdenti Madjıd Rashıdpen kezdesti. Taraptar birlesken jobalardy iske asyrý máselelerin talqylap, Ortalyq Azııa óńirinde paralımpıadalyq qozǵalysty damytýǵa qatysty pikir almasty.
Parıj paralımpıadasynda Qazaqstan ulttyq quramasynan alǵash bolyp parataekvondoshy Mılana Krasavseva jarys jolyna shyqty. Ol K44 saıysy boıynsha 52 kılo salmaq dárejesinde synǵa túsip, 1/8 fınalda domınıkandyq sportshyny jeńdi. Qazaqstandyq delegasııa otandasymyzdyń jekpe-jegine arnaıy baryp, qoldaý kórsetti.
Budan basqa, Máýlen Áshimbaev Dúnıejúzilik taekvondo federasııasynyń prezıdenti Chýng Von Chomen kezdesti.
