Foto: Ashyq derekkóz
Mınıstrliktiń málimetinshe, búginde joba aıasynda 165 shaqyrym kanal, 155 shaqyrym kollektor jáne 706 gıdrotehnıkalyq qurylysty jóndeý aıaqtalǵan. Nátıjesinde birqatar kanaldardyń tıimdiligi artyp, paıdaly áser koeffısıenti 60%-dan 90%-ǵa deıin ulǵaıǵan.
Sonymen qatar jobany 2025 jyly aıaqtaý josparlanyp otyr. Nátıjesinde, 12,5 myń gektar egis alqabyna sý berý sapasy jaqsarady. Sondaı-aq jyl saıynǵy sý shyǵyny 45 mln tekshe metrge azaıyp, jańadan 2400 turaqty jumys orny ashylady.
«Búginde qurylys-montaj jumystarynyń jartysy aıaqtaldy. Qazir Túrkistan oblysynda birqatar iri jobalar júzege asyrylyp jatyr. Sý resýrstary jáne ırrıgasııa mınıstrliginiń qoldaýymen 68 mln tekshe metr sý jınaı alatyn «Báıdibek-ata» sý qoımasy, sondaı-aq uzyndyǵy 21,7 shaqyrym bolatyn «Sarqyrama» kanaly salynyp jatyr», dedi Túrkistan oblysy boıynsha «Qazsýshar» fılıalynyń dırektory Qazybek Bedebaev.
