Foto: ile-tany.kz
Memleket basshysy aıtyp ótkendeı, elimizdiń ónerkásip áleýetin tolyq paıdalaný úshin jan-jaqty sharalar qabyldaý qajet. Osy maqsatta Úkimet 17 iri jobanyń tizimin jasady. Onda tereń óńdeý tásilin meńgerýge basymdyq berilgen.
«Men jýyrda Qaraǵandy oblysynda boldym. Sol kezde «Qarmet» metallýrgııa kombınatyna bardym. Otandyq ınvestor kelgen soń, ondaǵy ahýal edáýir turaqtaldy. Kásiporyn jańǵyrtyla bastady. Bul qadam óndiriletin ónim kólemin aıtarlyqtaı arttyrýǵa tıis. Saran qalasynyń ekonomıkasyn ártaraptandyrý jumysy júrgizilip jatyr. Onda avtokólik dońǵalaǵyn jáne turmystyq tehnıka shyǵaratyn óndirister iske qosyldy. Sonyń arqasynda bul eldi meken monoqalalar sanatynan shyǵaryldy. Basqa da monoqalalarǵa dem berý úshin osy tájirıbeni qoldaný qajet. Jalpy, aımaqtardyń ósip-órkendeýine jol ashatyn jańa óndiris oryndaryn barynsha damytý kerek», dep naqtylady Prezıdent.
Eske salaıyq, bıyl Memleket basshysynyń arnaıy Jarlyǵymen Alataý qalasy qurylǵan edi. Qasym-Jomart Toqaevtyń aıtýynsha, jańa qala qarqyndy damıtyn, ınnovasııa keńinen qoldanylatyn ári bilikti mamandar jumys isteıtin orynǵa aınalýy qajet. Úkimet onda jaıly ómir súrip, tabysty eńbek etýge, ınvestısııa salýǵa qolaıly jaǵdaı jasaýǵa tıis.
«Avtokólik qurastyrý isinde oń nátıjeler bar. Osy qarqyndy saqtap, jergilikti óndiris kólemin udaıy arttyrý kerek. Memlekettiń avtokólik ónerkásibine kórsetip jatqan jan-jaqty qoldaýy túptiń túbinde tolyqqandy avtokólik qurastyrý klasteri retinde eldiń ıgiligine aınalýy qajet», dep qosty Qasym-Jomart Kemeluly.
