Foto: akorda.kz
Jıyn bastalǵanǵa deıin Qasym-Jomart Toqaev Qarjy ortalyǵynyń ekojúıesin damytýǵa zor úles qosqan qatysýshylar qyzmetimen tanysty. Freedom Finance Global, China Construction Bank Corporation Astana fılıaly, Fix Price Group, Grata International jáne Binance Kazakhstan Technologies kompanııalarynyń basshylary óz qyzmetteriniń nátıjelerin baıandap, ınvestısııalyq jobalar, damý josparlary týraly málimet berdi
Otyrysty ashqan Memleket basshysy jahandyq kapıtal naryǵyndaǵy qarqyndy ózgerister, jańa halyqaralyq saýda-ekonomıkalyq baılanystardyń qalyptasýy, sondaı-aq elder arasyndaǵy ıntegrasııalyq prosesterdiń nyǵaıýy, qarjy aǵynyn qaıta bólý jaıynda aıtty.
Prezıdenttiń pikirinshe, qazirgi syn-qaterler men ózgerister Qazaqstan úshin jańa múmkindikterge jol ashady. Osy oraıda Memleket basshysy eldiń ornyqty ári qarqyndy damýyn qamtamasyz etýdegi «Astana» halyqaralyq qarjy ortalyǵynyń mańyzdy róline toqtaldy.
«Salystyrmaly túrde alsaq, qysqa merzim ishinde AHQO aıtarlyqtaı nátıjege qol jetkizdi. Investısııa tartý úshin óte yńǵaıly jaǵdaı jasaldy. Onyń aımaqta balamasy joq. Investorlarymyzǵa qolaıly salyq, vıza jáne eńbek rejımi usynyldy. Ár ınvestordy jeke jáne keshendi qoldaý qaǵıdalary engizildi. Ádil ári beıtarap sot júıesi quryldy. Jańa sıfrlyq sheshimderdiń arqasynda IPO-ǵa qatysý Qazaqstannyń barlyq turǵynyna qoljetimdi boldy», dedi Qasym-Jomart Toqaev.
Budan soń, Memleket basshysy AHQO aldynda aımaqtaǵy tabysty qarjylyq hab retindegi mártebesin nyǵaıtý mindeti turǵanyna nazar aýdardy. Sondaı-aq birqatar ózekti máselege toqtaldy.
Atap aıtqanda, Prezıdent el ekonomıkasyna odan ári ınvestısııa tartýdyń mańyzyn jáne ınvestısııalyq ekojúıeni jaqsartý qajet ekenin atap ótti.
«Ortalyq qazirdiń ózinde AQSh, Eýropa, Ulybrıtanııa, Azııa jáne Taıaý Shyǵys elderindegi birqatar seriktestermen tyǵyz yntymaqtastyq ornatty. Birikken Arab Ámirlikteri men Saýd Arabııasynyń iri kompanııalarymen ınvestısııalyq jobalardy ilgeriletý boıynsha jumys júrgizilip jatyr. Munyń bári AHQO-nyń ınvestısııalyq áleýetin jáne Qazaqstan ekonomıkasyn aıtarlyqtaı nyǵaıtýǵa múmkindik beredi. Degenmen Ortalyq Úkimetpen jáne ulttyq ınstıtýttarmen ózara yqpaldastyǵyn jandandyryp, retteýshi bazany jetildirýdi jalǵastyrýy qajet», dedi Qasym-Jomart Toqaev.
Memleket basshysy ótimdilik qor naryǵyn damytýdyń negizgi kórsetkishiniń biri ekenin atap ótti. Ony, eń aldymen, ınstıtýsıonaldyq ınvestorlar qamtamasyz etedi. Qazir azamattardyń zeınetaqy jınaǵynyń 50 paıyzyna deıingi bóligin jeke ınvestısııalyq basqarýshylarǵa berý boıynsha jumys bastaldy. Osy oraıda zeınetaqy aktıvteri men AHQO-daǵy qarjy ınstıtýttaryna sheteldik ınvestısııalyq basqarýshy kompanııalardyń qol jetkizýine múmkindik berý jaıyn oılastyrý qajet.
Bul rette Memleket basshysy Ulttyq bankke Úkimetpen, Qarjy naryǵyn retteý jáne damytý agenttigimen, AHQO-men birge kompanııalardy Ortalyqta lokalızasııalaý boıynsha talaptardy kúsheıtý múmkindikterin qarastyrýdy usyndy.
Prezıdent shetel naryǵynda bir mezgilde ornalastyrylǵan jaǵdaıda jergilikti qor naryǵyndaǵy baǵaly qaǵazdardyń úlesi men kóleminiń shegin birtindep ulǵaıtýdy basym mindettiń biri retinde atady. Sonymen qatar jeke qazaqstandyq kompanııalardy ashyq alańǵa shyǵarýdy yntalandyrýdyń mańyzdylyǵyna nazar aýdardy. Bul olardyń qyzmetiniń jarııalylyǵy men tıimdiligin rastaıdy.
Qasym-Jomart Toqaevtyń aıtýynsha, kelesi basymdyq – bekitilgen «oıyn erejesin» qatań saqtaý.
«Konstıtýsııalyq zań kepildik bergen AHQO-daǵy salyq rejımi Ortalyqty damytý strategııasynyń mańyzdy bóligi sanalady. Ol jahan ınvestorlary úshin Qazaqstannnyń tartymdylyǵyn arttyrýda negizgi ról atqarady. Bul bizdiń turaqty ustanymymyz, odan bas tartpaımyz», dedi Memleket basshysy.
Prezıdenttiń pikirinshe, Qazaqstanda kómirtek naryǵyn damytý – memlekettik saıasattyń basym baǵyttarynyń biri. Qazir Eýropa Odaǵy elderi kómirtek mehanızmderin shekarada retteýdi engizýge daıyndalyp jatyr. Bul otandyq ónimderdi Eýropaǵa eksporttaýǵa edáýir kedergi keltirýi múmkin.
Budan bólek, Memleket basshysy tótenshe jaǵdaıǵa qarsy turýdyń tıimdi qarjylyq tetigin qurý qajet ekenine toqtaldy. Túrli memlekettik saqtandyrý qorlary tabıǵı apattardyń saldarymen kúresýge qoldaý kórsetýi kerek. Úkimet Qarjy naryǵyn retteý jáne damytý agenttigimen, «Astana» halyqaralyq qarjy ortalyǵymen birlesip, Ortalyq ıýrısdıksııasynda osy maqsattaǵy qor qurý máselesin jan-jaqty zertteýi kerek.
Qasym-Jomart Toqaev otyrysty qorytyndylaı kele AHQO-nyń byltyr atqarǵan qyzmetiniń jyldyq esebin bekitti.
Is-sharada AHQO basqarýshysy Renat Bekturov, Solidcore Resources plc kompanııasynyń bas atqarýshy dırektory Vıtalıı Nesıs, Amicorp Fund Services kompanııasynyń bas operasııalyq dırektory Robın Hıokıan, AHQO Sotynyń tóraǵasy lord Iаn Bernett, AHQO qarjy qyzmetterin retteý komıteti dırektorlar keńesiniń tóraǵasy Anjela Naıt, AHQO Bırjalar dırektorlar keńesiniń tóraǵasy Tımotı Bennett sóz sóıledi.
