2024 jyly 5 qyrkúıekte Eurasian Resources Group-tiń enshiles kompanııasy Eurasian Natural Resources Corporation Limited (ENRC), Ulybrıtanııanyń ekonomıkalyq qylmysqa qarsy kúres qyzmeti (Serious Fraud Office – SFO) men Dechert zańgerlik fırmasy jáne onyń burynǵy seriktesi Nıl Djerrardqa qarsy uzaqqa sozylǵan sot prosesinde taǵy bir márte jeńiske jetti. Osy aptada Anglııa men Ýelstiń apellıasııalyq soty Joǵary sottyń SFO jáne jetekshi halyqaralyq Dechert zańgerlik fırmasynyń laýazymdy qyzmetkerleriniń zańǵa qaıshy áreketi men SFO-nyń ENRC-ge qatysty zańsyz qylmystyq tergeý bastaýyna qatysty shyǵarǵan sheshimin zańdy dep tapty.
Joǵary sottyń 2022 jylǵy mamyrdaǵy sheshimi (1 kezeń).
2022 jyldyń mamyr aıynda Joǵary sottyń sýdıasy Vaksman Birikken koroldiktiń sot tájirıbesinde buryn-sońdy bolmaǵan sheshim shyǵardy. Ol Dechert zańgerlik fırmasynyń seriktesi Nıl Djerrard pen SFO-nyń joǵary laýazymdy tulǵalarynyń áreketin «óreskel» ári «aqylǵa syımaıtyn» zańbuzýshylyqtar dep atady.
Sot úkiminde SFO-nyń burynǵy laýazymdy tulǵalalary, sonyń ishinde burynǵy dırektory Rıchard Oldermen de ENRC-ge qatysty «aram nıetpen» áreket etti delingen. Dechert zańgerlik fırmasynyń seriktesi Nıl Djerrard sanaly túrde ári birneshe márte qatarynan zań talaptaryn buzyp, óziniń klıenti – ENRC-ge qarsy «óreskel» áreketter jasap, óz mindetterin aıaqasty etip, onyń múddesine qarsy áreket etken. Odan bólek, ol advokat qupııasymen qorǵalǵan konfıdensıaldy aqparattyń jarııalanyp ketýin uıymdastyryp otyrǵan. ENRC-ge júıeli túrde qate zańgerlik keńester bere otyryp, Dechert kompanııasy usynǵan kórsetiletin qyzmet kólemin ulǵaıta berýge tyrysqan. Sýdıa Vaksman Dechert fırmasynyń SFO-men árekettestigine qatysty ustanymyn qatań synǵa aldy. Sottyń anyqtaýynsha qasqana jalǵan málimdemeler men usynystar halyqaralyq zańgerlik fırmanyń biliksizdiginen emes, jeke múddeni qorǵap, sonyń ishinde tólemaqyny ulǵaıtý úshin sanaly túrde jasalǵan. Oǵan qosa, Djerrard myrza SFO-nyń qos kýágeri, sonyń ishinde burynǵy SFO dırektorynyń mindetin atqarýshy Mark Tompsonmen birlesip, ant bere otyryp, jasalǵan zańbuzýshylyqty jasyrý úshin jalǵan kýálik bergen.
Sýdıa ENRC isindegi sheshýshi argýment SFO sansyz jasyryn ári «qupııa» kezdesýlerde Djerrardty sanaly túrde ıtermelep, zańǵa qaıshy áretterin yntalandyryp otyrǵanyn qabyl aldy. Sýdıa brıtan vedomstvosynyń qyzmetkerleri Djerrad myrzanyń ENRC aldyndaǵy mindettemelerin buzýyn «yntalandyra otyra», SFO qyzmetkerleri «aram nıetti portýnızm»-di basshylyqqa alǵan, dep túıindedi. SFO osyndaı árekettestik baryn, Djerrad myrza men óz qyzmetkerleriniń zańsyz baılanystary baryn ENRC-den jasyrǵan.
Joǵary sottyń 2023 jyldyń jeltoqsan aıyndaǵy sheshimi jáne ENRC-ge qatysty qylmystyq tergeýdiń toqtatylýy.
Joǵary sottyń ekinshi sheshimi 2023 jyldyń jeltoqsan aıynda shyqty. Onda ENRC-diń (1 kezeń 1A) shaǵymyn odan ary qarastyrý barysynda eger SFO men Dechert tarapynan zań óreskel buzylmaǵan jaǵdaıda, kompanııaǵa qatysty tergeý bastalmaýy tıis ekeni anyqtalǵan. Osylaısha, Joǵary sot ENRC isine qatysty qylmystyq tergeýdi bastaýdyń ózin zańsyz dep tanydy.
2023 jyly tamyzdyń 24-i kúni SFO ENRC isine qatysty bastalyp, on jyldan astam ýaqyt boıynsha tergelip kele jatqan isti eshbir aıyp taqpastan toqtatatynyn habarlaǵan bolatyn.
SFO, Dechert pen Nıl Djerrardtyń apellıasııalyq shaǵymdary qanaǵattandyrylmady.
2024 jyldyń sáýir aıynda SFO, Dechert pen Nıl Djerrard joǵaryda aıtylǵan sot sheshimine shaǵymdandy. Alaıda, Apellıasııalyq sot shaǵymdy qanaǵattandyrýdan bas tartty.
Lord-sýdıa Meıls jaýapkerler apellıasııaǵa usynǵan negizdeme sot barysynda Joǵary sot sýdıasy anyqtaǵan faktilerdi qaıta aqtaý krıterıılerine saı kelmeıtinin kórsetip, qaýly shyǵardy.
Osylaısha apellıasııalyq sot sýdıa Vaksman shyǵarǵan sheshimdi ózgerissiz qaldyrdy. Bul ENRC talaptary zańdy ekenin taǵy bir márte rastap, sol sebepten SFO men Dechert-ten ENRC shyǵyndaryn óndirip alý kerek ekenin qoldady. Apellıasııalyq sot zańdy kúshine endi ári túpki sheshim sanalady. Iаǵnı atalǵan isti qaıta qaraýǵa bolmaıdy.
Prosess jalǵasyp jatyr (2 kezeń).
Joǵary sottaǵy kelesi kezeńde 2013 jyly bastalǵan qylmystyq tergeýge baılanysty kompanııanyń jumsaýyna týra kelgen qosymsha shyǵyndardy ótep alý máseleleri qaralady. Atap aıtqanda, SFO men Dechert-tiń zańsyz áreketi saldarynan kompanııanyń sotqa jumsaýyna týra kelgen shyǵyndardy, nesıe alý úshin jumsalǵan artyq shyǵyndar men ózge de ekonomıkalyq shyǵyndardy óndirip berýdi talap etip otyr.
Kompanııa sotta ádildikke jetip, úshinshi taraptardyń zańǵa qaıshy áretterinen óziniń quqyn qorǵaýdy jalǵastyra beredi.
