Qarjylyq monıtorıng agenttigi Astana qalasynyń «Mádenıet basqarmasy» MM-niń burynǵy basshysy men merdiger uıym ókilderine qatysty asa iri kólemde bıýdjet qarajatyn jymqyrý faktisi boıynsha sotqa deıingi tergeý amaldaryn júrgizip jatyr.
«2016 jyly Astana kúni merekesine oraı salynǵan «Kún» («Esil ózenindegi jaryq-ıllıýmınasııalyq jáne ot shoýy») sýburqaǵynyń qurylysy kezinde memlekettik satyp alý rásimderi júrgizilmeı, tikeleı kelisimsharttar jasalǵan», delingen habarlamada.
Sýburqaq jobalyq qujattamasyz jáne memlekettik saraptamadan ótpeı salynǵan.
Sondaı-aq qurylys barysynda tehnıkalyq sıpattamalarǵa sáıkes kelmeıtin sapasyz materıaldar qoldanylǵan.
Nátıjesinde atalǵan nysan 2017 jyldan bastap jumys istemeı, qazirgi tańda apatty jaǵdaıda tur.
Urlanǵan qarajattyń kólemi 1 mlrd teńgeden asyp otyr.
«Astana qalasynyń «Mádenıet basqarmasy» MM-niń burynǵy basshysy ustalyp, ýaqytsha ustaý ızolıatoryna qamaldy. Tergeý aıasynda onyń 3 kommersııalyq nysany, 2 avtoturaq orny jáne Astana qalasynda premıým sanattaǵy páteri bar ekendigi anyqtaldy», dep habarlady QMA.
Atalǵan is boıynsha kúdiktilerdiń múlkine jalpy somasy 572 mıllıon teńgeden astam somaǵa shekteý qoıyldy.
QR QPK 201-babyna sáıkes, sotqa deıingi tergep-tekserý derekteri jarııa etýge jatpaıdy.
QR Konstıtýsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.
