Jigitterdiń qarqyny jaqsy

Demek kókpardyń tarıhy tereń. Sondyqtan da bul saıys túri kóshpeliler oıynyna enip otyr. Bul jolǵy dúbirli jarysqa 9 eldiń komandasy qatysyp, qazirgi tańda «Qazanat» atshabarynda irikteý oıyndaryn ótkizip jatyr.

9 qyrkúıek kúni alańǵa shyq­qan qos komanda Qazaqstan jáne О́zbekstan quramasy boldy. Atalǵan oıynda Qazaqstan quramasynyń kapıtany Qur­manbek Turǵanbek oıynnyń ekinshi mınýtynda esep ashty. Osylaı saıys tizgini bizdiń jigitterdiń qolyna kóshti. Eki taımǵa sozylǵan doda kezinde Qurmanbek Turǵanbek tórt, Abylaıhan Nyshanbekov pen Ernar Jarylqasyn árqaısysy úsh-úshten, Ernat Málimbaı men Ulan Baıtóreev árbiri eki-ekiden, Baqytjan Ázimbaı, Arman Jamalbek, Ádilet Mamyt úsheýi bir-bir dúrkin salym salyp, nátıjesinde elimizdiń quramasy 16:0 esebimen aıqyn jeńiske jetti.

Kelesi oıyn Reseı jáne Qytaı quramasy arasynda ótti. Shyn­dyǵynda ekeýi de ortanqol kókparshylardan quralǵan eken. Oıynnyń altynshy mınýtynda reseılik Qalybek Soltobaev esep ashyp, alǵashqy taım 2:0 esebimen reseılik shabandozdar paıdasyna sheshildi. Ekinshi taımda qytaılyq qandastarymyz da bir salymǵa qol jetkizdi. Esep 4:1. Reseı quramasy – jeńimpaz.

Irikteý kezeńdi iri jeńispen bastaǵan quramanyń biri – aıyrqalpaqty aǵaıyndar. Olar Mońǵolııa eliniń atynan óner kórsetýge kelgen baıólkelik qa­zaqtardy 16:0 esebimen tize búk­tirdi. Osy nátıjege qarap-aq qyrǵyz aǵaıyndardyń qan­shalyqty daıyndyqpen kelgenin ańǵarýǵa bolatyn sııaqty.

Tórtinshi jup bolyp alańǵa shyqqan qart qurlyqtan kelgen qos komanda Majarstan men Túrkııa kókparshylary tym sylbyr oınady. Alǵashqy taımda esep ashylmady. Ekinshi aınalymda 7-nómirde óner kórsetken túrkııalyq shabandoz Başaran Çağlar esep ashty. Nátıje 1:0. Bir qyzyǵy, bul kórsetkish oıyn sońyna deıin ózgergen joq.

Jarystyń kelesi kúni alǵash­qy saıys Qazaqstan men AQSh kókparshylary arasynda bas­taldy. Oıynnyń birinshi mınýtynda elimizdiń kókparshysy Abylaıhan Nyshanbekov salym salyp úlgerdi. Qansha aıtqanmen qonaqjaı halyqpyz emes pe, bizdiń ulandar muhıt asyp kelgen kovboılarǵa iltıpat kórsetip, salym salýǵa múmkindik týǵyzdy. Sóıtip, alǵashqy taım 5:3 esebimen aıaqtaldy.

Bir kún buryn kók bórú oıynynda qyrǵyzdardan 18:0 esebimen utylǵan AQSh jigitterine bul bir jabyrqaǵan kóńiline qut qonǵandaı áser berdi. Biraq ekinshi taımda bel sheship oınaǵan bas bapker Nurdáýlet Momynovtyń jigitteri 12:4 esebimen oıynǵa núkte qoıdy.

Ekinshi bolyp alańǵa shyqqan Qyrǵyzstan jáne Túrkııa qura­masy boldy. Kókpar maman­da­rynyń sózine sensek, túrkııa­lyqtar alǵashqy taımda janyn salyp oınady. Tipti basqany qyryna il­meıtin qyrǵyzdardyń sheńberine tú­rik shabandozy Demırkól Isa bir ret salym saldy. Biraq sońǵy ná­tıje 15:1 ese­bimen qyrǵyz baýyr­lardyń úlesinde.