Foto: Májilistiń baspasóz qyzmeti
Nartaı Aralbaıuly beıbit kúnde qazaq sarbazdary túrli dene jaraqatyn alyp, tipti keıbireýi qaıtys bolyp jatqanyn tilge tıek etti.
«Bul bir emes, birneshe ret qaıtalanyp jatqan jaǵdaı. Osynyń saldarynan aıyppul salmaq túgili aıyp taqsań da eshkim baýyr eti balasyn jastar jan tapsyrǵan orta – ásker qataryna jibergisi kelmeıdi», dep sózin bastady depýtat.
Májilismen keltirgen sandyq derekterge zer salsaq, sońǵy úsh jylda Qazaqstanda 270 áskerı qyzmetker qaıtys bolǵan, al sońǵy tórt jylda áskerde 86 sýısıd tirkelgen. Taǵy 20 áskerı adam sýısıdke oqtalǵan.
«2023 jylǵy tamyzda áskerı bólimshelerdiń birinde komandır áskerge jańadan kelgen sarbazdy oryndyqpen uryp, soqqyǵa jyqqan. Al 2024 jyldyń maýsym aıynda Jambyl oblysynyń bir áskerı bólimshesinde áskerde júrgenine 1-aq aı bolǵan sarbaz es-tússiz jansaqtaý bólimine túsken. Taıaýda bolǵan jaǵdaı búkil otandasymyzdyń ashý-yzasyn týǵyzǵany haq. Ulttyq ulan jaýyngeri Erbaıan Muhtar basynan alǵan jaraqattan bes aı boıy es-tússiz jatyr. Jaýaptylar bolsa jaýapkershilikten jaltaryp, «Erbaıan dárethanaǵa qulap, jaraqattandy» deıdi. Buǵan kim senedi? Jaraqattyń saldarynan sarbazdyń basynyń jartysyn alyp tastaýǵa týra kelgen. Endi oǵan turaqty kútim qajet», dep kúrsindi Nartaı Aralbaıuly.
Ol 7 qyrkúıek kúni Aqtaýdaǵy gornızonda Marat Barqulov esimdi sarbaz kóz jumǵanyn eske saldy. Ony ofıser atyp tastaǵan. Biraq bul qasaqana jasalǵan áreket pe, álde jazataıym oqıǵa ma? Atalǵan suraqtyń jaýabyn tergeý oryndary áli beogen joq.
«Memleket basshysy bıylǵy Joldaýynda: «Ár ata-ana áskerge ketken balasyn memleketke senip tapsyrady. Sondyqtan sarbazdardyń densaýlyǵy men qaýipsizdigine, eń aldymen, armııa basshylyǵy jáne quqyq qorǵaý mekemeleriniń basshylary jaýapty», degen edi. О́kinishke qaraı, armııadaǵy jaǵdaı buǵan múldem kereǵar bolyp tur. Byltyr Qorǵanys mınıstrligi áskerı bólimderde 50 myńnan astam beınekamera ornatylǵanyn habarlady. Ondaǵy jazbalar qaıda? Álde Erbaıan sekildi baýyrlarymyz jaraqat alyp jatqanda álgi kameralar teris qarap qaldy ma?», dedi depýtat.
Aıta keteıik, «Amanat» partııasy áskerdegi álimjettik máselesin 2022 jyly kótergen edi. Alaıda jaǵdaı túzelmek túgili, ýshyǵyp ketti dese de bolady. Sarbazdardyń áskerde jaraqat alyp, qaıtys bolý faktileri tek artyp otyr.
Nartaı Aralbaıulynyń pikirinshe, búginde áskerı qyzmetkerlerdiń áleýmettik jaǵdaıy tómen, al bul jaǵdaıdy túzetý kezek kúttirmeıtin másele.
Osy tusta májilismen Rýslan Jaqsylyqovty mańyzdy ári tıimdi shapralardy qolǵa alýdy surady.
«Qoryta kele, Sizden kelesi sharalardy qolǵa alýdy usynamyn. Elimizdiń armııasyndaǵy atalǵan keleńsizdikti tyıý jáne onyń aldyn alý boıynsha naqty sharalar qabyldaý qajet. Sondaı-aq áskerılerdiń áleýmettik jaǵdaıyn jaqsartýǵa baǵyttalǵan is-áreketterdi kúsheıtý kerek», dep sózin aıaqtady depýtat.
