Foto: parlam.kz
«Prezıdent Qasym-Jomart Toqaev jyl saıynǵy halyqqa Joldaýynda astyn syzyp turyp aıtatyn tapsyrmalarynyń biregeıi – «ashyqtyq pen ádilettilik». Biraq sol maqsatty iske asyrý jolynda Úkimet músheleri men ózge memlekettik organdar mardymsyz jumys istep otyrǵanyna kún saıyn kózimiz jetedi», dedi Rınat Zaıtov.
Ol Parlament Májilisi halyqpen tikeleı baılanysta bolatynyn, sondaı-aq ár juma saıyn jurttyń aryzyn tyńdap, ótinishterin qabyldaıtynyn eske saldy. Azmattardyń basym kópshiligi belgili bir vedomstvo basshysynyń qabyldaýyna kirgisi keledi. Rınat Zaıtovtyń aıtýynsha, buǵan óńirlerdegi jáne alyp megapolısterdegi sholaq belsendi, ortasha deńgeıdegi qyzmetkerlerdiń «ózim bilemdikke» salyp zań buzýy tyıylmaı jatqany sebep bolyp otyr.
«Buǵan toqtaý qoıatyn Bas prokýratýra, Joǵarǵy sot pen mınıstrlerdiń esigi halyq kelgende bir ashylǵan emes. Bul qalaı? «Estýshi Úkimet» qaǵıdatyn ustanýdy tapsyrǵan Memleket basshysynyń sózi eskerilýge de tatymaǵany ma? Zań tilimen aıtqanda, QR ÁRPK 90-babynyń 1-tarmaǵyna sáıkes memlekettik organdardyń basshylary jáne olardyń orynbasarlary tıisti memlekettik organnyń basshysy bekitetin qabyldaý kestesine sáıkes aıyna keminde bir ret azamattardy jáne zańdy tulǵalardyń ókilderin, onyń ishinde osy organdardyń qyzmetkerlerin jeke qabyldaýdy júrgizýge mindetti. Sonymen qatar «QR sot júıesi men sýdıalarynyń mártebesi týraly» QR Konstıtýsııalyq zańynda QR Joǵarǵy soty tóraǵasynyń azamattardy jeke qabyldaý mindeti kózdeledi (20-baptyń 1-tarmaǵynyń 10) tarmaqshasy)», dep túsindirdi depýtat.
Májilismenniń aıtýynsha, bul zańdardy oryndaýda, halyqtyń suraýyn qanaǵattandyrýda memlekettik organdar salǵyrttyq tanytyp otyr.
«Joǵaryda aıtylǵandy eskere otyryp, Sizderden atalǵan laýazymdy tulǵalar men halyqtyń arasynda kedergisiz baılanys ornatý joldaryn qarastyrýlaryńyzdy jáne azamattardyń aryzdary syrǵytpa jaýap (otpıska) deńgeıinde qalmaýyn qadaǵalaý júıesimen qamtamasyz etýlerińizdi, tipti bolmasa, depýtattardyń esigi kórinbeıtin kabınetterge eldiń ótinishin jetkizýge múmkindik berýlerińizdi QR Parlamenti Májilisi Reglamentiniń 11-taraý 149-tarmaǵyna sáıkes talap etemin», dep sózin aıaqtady Rınat Zaıtov.
