Atyraý oblysynyń ákimi Serik Shápkenovtiń aıtýynsha, Memleket basshysy Qasym-Jomart Toqaevtyń tikeleı tapsyrmasymen óńirdegi medısınalyq mekemelerdiń materıaldyq-tehnıkalyq bazasyn jaqsartý jumysy júıelenip otyr. Bıyl 7 medısınalyq nysan boı kóterdi. Onyń ishinde shalǵaıda ornalasqan 3 aýylda feldsherlik-akýsherlik pýnkt qurylysy aıaqtalyp, qoldanysqa berildi. Qazir 15 eldi mekende dárigerlik ambýlatorııa salynyp jatyr.
«Jergilikti bıýdjettiń qarjysyna Haval N6 jáne Haval M6 markaly kólikteri satyp alyndy. Endi alys aýdandardaǵy medısına mekemelerin qajetti jabdyqtarmen qamtý josparlanyp otyr. Jylyoı aýdanynyń ortalyǵy – Qulsary qalasyndaǵy ortalyq aýrýhanaǵa MRT apparaty ornatyldy. Osyndaı dıagnostıkalyq qurylǵyny Qurmanǵazy jáne Inder aýdanyndaǵy aýrýhanalarǵa da ornatýdy kózdep otyrmyz. Munymen birge dárigerlerge áleýmettik qoldaý kórsetip, baspanamen qamtý máselesi qolǵa alyndy», dedi S.Shápkenov.
Oblystyq densaýlyq saqtaý basqarmasy bastyǵynyń orynbasary Jaqsylyq Januzaqovtyń málimetine súıensek, 15 jańa kólik aýdandardaǵy aýrýhanalar men aýyldyq ambýlatorııalyq pýnktterge beriledi. Al 25 kólik Atyraý qalasyndaǵy emhanalar men psıhıkalyq densaýlyq ortalyǵyna, Damby dárigerlik ambýlatorııasyna tapsyryldy.
Atyraý qalasyndaǵy №3 emhana dırektorynyń mindetin atqarýshy Mırgúl Kenjeǵalıevanyń aıtýynsha, munda 53 myńǵa jýyq turǵyn tirkelipti. Olarǵa 30 dáriger medısınalyq qyzmet kórsetedi.
«Bizdiń emhananyń janynda birneshe ambýlatorııa bar. Bul ambýlatorııalar Aqjar, Aqsaı, Almaly, Bereke eldi mekenderinde ornalasqan. Dárigerler kúnine 500-den 700-ge deıin pasıent qabyldaıdy. Turǵyndarǵa jedel qyzmet kórsetý úshin sanıtarlyq kólik qajet. Endi bizdiń emhana men ambýlatorııalarǵa 5 jańa kólik bólinip otyr. Bul dárigerlerdiń sapaly qyzmet kórsetýine oń yqpalyn tıgizedi», deıdi
M.Kenjeǵalıeva.
Atyraý oblysy
