Qazaqstannyń Halyq qaharmany, KSRO jáne Qazaqstannyń halyq ártisi, KSRO Memlekettik syılyǵynyń laýreaty rejısser Ázirbaıjan Mámbetovtiń 90 jyldyǵyna arnalyp qoıylǵan spektakldiń kórermenine aıtary mol. Birtýar rejısserdiń qaıtalanbas sýretkerlik qoltańbasy arqyly eń alǵash qazaq kórermenine jetken aıtýly týyndy jańa ǵasyrmen birge jastardyń jańashyl qózqarasy negizinde teatrsúıer qaýymmen qaıta qaýyshyp otyr.
Ár týyndysy álemge áıgili bolǵan Shyńǵys Aıtmatovtyń «Ǵasyrdan da uzaq kún» romany – taǵdyrdyń taramys joldaryn sýrettegen ǵasyrlyq týyndy. Bir boıyna Borandy beket, Saryózek, El ishi, Jer planetasy syndy birneshe aýqymdy keńistikti syıdyryp turǵan shyǵarmanyń kórermenin tolǵantatyn tusy kóp. Osy keńistikterdiń toǵysynda jazýshy qalamynan bas keıipker Borandy Edigeniń keskini qalyptasqan. «Borandy beket» qoıylymynda Qazanǵaptyń aqtyq amanaty oryndala ma? Ǵasyrǵa tatyǵan bir kúndik jaýapty sapardyń nátıjesi qandaı bolmaq?
Mine, osy saýaldarǵa jaýap izdegen qoıylym kórermenin de beıjaı qaldyrmaıdy. Sahna kórgen kúninen bastap-aq talaı teatr festıvalinde top jaryp, qanjyǵa maılaǵan spektakldiń sýretkerlik turǵyda saraptalýy kóńilge qurmet ornyqtyrdy. Jazýshy Shyńǵys Aıtmatovtyń klassıkalyq týyndysyn búgingi kúnmen sátti baılanystyryp, ózektiligi ótkirilene túsken qoǵam túıtkilderin teatr tilinde sheber jetkize bilgen rejısser Ulanmyrza Qarypbaev pen teatr ártisteriniń izdenisi kórermenniń qoıylymdy laıyqty deńgeıde qabyldap, qorytýyna tamasha múmkindik syılady.
Ázirbaıjan Mámbetov atyndaǵy teatrdyń kórnekti rejısser muratyna, Mámbetov mektebine adal bolyp, tulǵa esimin jańǵyrtý jolynda jasaǵan tabysty jumysyna tek qana qoshemet bildiremiz.
