Ile aýdanynda ornalasqan otandyq «Bent» kompanııasy osyǵan deıin temirjol relsi men beton tósenish shyǵaryp kelgen edi. Jýyrda kompanııa jańa kezeńge qadam basty. Olar bul joly salada tájirıbesi mol qytaılyq kásiporynmen birlesip, rels bekitýge arnalǵan 5 birdeı qosalqy bólshekti óndirýdi bastady. Budan bylaı qazaq temirjoly syrttan keletin rels bólshekterine táýeldi bolmaıdy. Jobanyń jalpy quny – 6 mln dollar. Zaýyt sońǵy úlgidegi qondyrǵylarmen jabdyqtalǵan. Munda tipti bolat klemalardy adamnyń aralasýynsyz robottar jasaıdy. Robottar tehnıkalyq jaǵynan kúrdeli jáne qaýipti barlyq úderisti júrgizedi. Bir robot 3 adamnyń jumysyn oryndaıtyn kórinedi.
«Bizdiń ónerkásiptik kompanııalar birlestigi búginde temirbeton shpaldarynan basqa rels bekitpeleriniń tolyq keshenin shyǵarýdy ıgerdi. Sonyń nátıjesinde, jylyna 800 myń dana rels shpaly men 1 mln 200 myń danadan asa bekitkishi bar rels jıyntyǵyn shyǵarýǵa múmkindik alyp otyrmyz. Keıingi 5 jyldaǵy ınvestısııanyń barlyq kólemi 7 mlrd teńgeden asty. Ozyq tehnologııalar men óndiristi robottandyrýǵa basymdyq berip otyrmyz», deıdi kompanııa prezıdenti Dinmuhamed Kýzıev.
Aıtýynsha, óndiriste robottardy paıdalaný qaýipsizdikpen qatar joǵarǵy dáldikti qamtamasyz etedi jáne eńbek ónimdiligin eselep arttyrady.
Sońǵy úlgimen jabdyqtalǵan jeke zerthanada ónimniń barlyq sapa standartyna sáıkestigin qamtamasyz etýge 400-den astam synaq túri júrgiziledi.
«Bizden shyqqan materıaldar barlyq normatıvtik qujat pen tehnıkalyq sıpattamaǵa saı bolýǵa tıis. Sondaı-aq biz memlekettik standart pen tehnıkalyq reglamentterge sáıkes keletin joǵary sapaly ónim shyǵarýdy qamtamasyz etemiz», deıdi sertıfıkattaý ortalyǵynyń bas dırektory Hadjıakbar Shırhanov.
Qazir kompanııalar tobynyń kásiporyndarynda 600-den asa adam turaqty jumys isteıdi. Olardyń eńbek jaǵdaıy men kásibı ósý múmkindigi aldyńǵy orynǵa qoıylǵan.
«Osyndaı zamanaýı kásiporynda jumys istep jatqanyma maqtanamyn. Bizdiń kásiporynda tek elimizde emes, shetelde de suranysqa ıe ónim shyǵarylady. Munda qarapaıym eńbek adamyna qajettiniń bári bar. Eńbekaqymyz da jaman emes. Eń bastysy – el ekonomıkasynyń ilgerileýi jolynda ter tógip jatyrmyz», deıdi tájirıbeli slesar Ádilhan Sadyqaev.
Kásiporynnyń jańa ashylǵan qosalqy sehynda 100 adam turaqty jumyspen qamtylǵan. О́nimderi ishki naryqpen qatar, Reseı, Qyrǵyzstan naryǵyna eksporttalady.
Almaty oblysy
