foto ru.freepik.com
Bıyl sáýir aıynda azamattardy kýálandyrý prosesine táýelsiz sarapshylardy engizý tetigin synaqtan ótkizý úshin Eńbek jáne halyqty áleýmettik qorǵaý, Densaýlyq saqtaý, Sıfrlyq damý, ınnovasııalar jáne aeroǵarysh ónerkásibi mınıstrlikteri birlesken buıryq qabyldady. Ol úmitkerlerdiń testileýden ótý jáne talap etiletin qujattar toptamasyn usyný tártibin retteıdi.
Sarapshylyqqa úmitkerlerge qoıylatyn negizgi talaptardyń biri joǵary medısınalyq bilimi, densaýlyq saqtaý salasyndaǵy maman sertıfıkaty, sondaı-aq medısınalyq-áleýmettik saraptama júrgizý máseleleri boıynsha sońǵy 5 jylda oqýdan ótkenin rastaıtyn qujaty bolýy tıis. Osylaısha, táýelsiz sarapshylardy irikteý biliktilik deńgeıi men jumys ótili eskerile otyryp, konkýrstyq negizde júzege asyrylatyn bolady.
MÁS-ke táýelsiz sarapshylardy tartý boıynsha jańa jobany iske qosý sheńberinde konkýrsqa 50-ge jýyq adam qatysty. Irikteýdiń barlyq kezeńderinen 18 sarapshy dáriger ótip, jumysqa kiristi.
Medısınalyq qujattar memlekettik organdar men Densaýlyq saqtaý mınıstrliginiń aqparattyq júıelerinen alynǵan derekter negizinde sarapshyǵa avtomatty túrde túsedi. Isterdi bólý eksaýmaqty tártippen júzege asyrylady. Bul Almatyda turatyn sarapshyǵa Almatydan basqa elimizdiń ózge óńirlerinen qujattar kelip túsetinin bildiredi.
Táýelsiz sarapshylar ınstıtýtyn engizýdiń maqsaty azamattardyń sarapshylarmen jáne tıisinshe sybaılas jemqorlyq quramdas bólikterimen tikeleı baılanysyn boldyrmaýǵa baǵyttalǵan.
Medısınalyq-áleýmettik saraptama rásimderin júrgizgennen keıin, múgedektik toby anyqtalǵan kezde, tıisti áleýmettik tólemder men arnaýly áleýmettik qyzmetterdi odan ári taǵaıyndaý ótinish berýshiniń qatysýynsyz proaktıvti túrde júrgiziledi. Esterińizge sala keteıik, MÁS ótkizýdiń syrttaı formaty boıynsha qanatqaqty joba 2022 jyldyń 1 qańtarynan bastap Qazaqstannyń barlyq aýmaǵynda synaqtan sátti ótip jatyr. Búgingi kúni syrttaı proaktıvti formatta kýálandyrý 30 nozologııalyq nysan boıynsha júrgiziledi. Jyl basynan bastap respýblıkanyń barlyq óńirinde 60,4 myńnan astam ótinim qaralǵan.
QR Áleýmettik kodeksinde 2025 jylǵy 1 qańtardan bastap elimizde táýelsiz sarapshylar ınstıtýtyn tolyq kólemde engizý kózdelgen.
