«Tugan Qala» forýmyna memlekettik organdar, ónerkásip ındýstrııasy ókilderi, qazhromdyqtar men osy sharanyń uıymdastyrylýyna atsalysqan bastamashyl turǵyndar, forýmnyń baǵdarlamasyn ázirleýge qatysqan «Dóń» TKBK qyzmetkerlerin qosa alǵanda, jalpy sany 150-den adam jınaldy.
– ERG-diń «Tugan Qala» syndy mańyzdy jobalaryn qyzmetkerlerimiz ben turǵyndardyń qoldaýynsyz iske asyrý múmkin emes. Bul bastamalarǵa qatysýshylar sany jyldan-jylǵa artyp keledi. Biz olarmen birge eldi mekendi «arman qalaǵa» aınaldyrýǵa umtylamyz, – dedi Eýrazııalyq top bas dırektorynyń personal jáne mádenıet jónindegi orynbasary Aqmaral Naızabekova. – Hromtaý turǵyndary da bul jobaǵa belsene atsalysyp jatyr. Tórt jyl ishinde áleýmettik jobalarǵa 2,2 mlrd teńge jumsaldy. Atap aıtsaq, balabaqsha, mádenıet saraıy, Hromtaýdaǵy ózge de áleýmettik nysandardyń qurylysyna qoldaý jasaımyz.
Eurasian Resources Group (ERG) – tabıǵı resýrstardy óndirý men óńdeý, energetıka, logıstıka jáne marketıng salalarynda tolyq biriktirilgen, álemdegi eń iri ártaraptandyrylǵan kompanııalardyń biri. Toptyń qurylǵanyna bıyl – 30 jyl. Búginde tórt qurlyqta ornalasqan ERG-diń kásiporyndary óz salasy boıynsha eń iri jumys berýshilerdiń biri.
Forým qonaqtary «Tugan Qala» jobasynyń Hromtaýdaǵy alty nysanyn aralap kórdi. Qalaǵa arnaǵan tilekterin arnaıy bannerge jazyp qaldyrdy. Qonaqtardyń bir toby ortalyq saıabaqtan bastap aýǵan soǵysy ardagerlerine arnalǵan eskertkishke deıin avtobýspen serýendep baryp qaıtty.
– Forýmǵa qatysýshylar bar-joǵy 10-12 mıllıon teńgege sapaly, tolyqqandy ınfraqurylym nysandaryn iske asyrýǵa bolatynyn kórip, qaıran qaldy, – deıdi forýmdy uıymdastyrýshylardyń biri, Áleýmettik tehnologııalardy damytý qaýymdastyǵynyń menedjeri Gaýhar Asylbek. – Bul – «Tugan Qala» jobasynyń tıimdiliginiń aıqyn dáleli. Forým Hromtaý qalasynyń damýyna septesip, qala turǵyndarynyń ómir súrý sapasyn jaqsartýǵa baǵyttalǵan. Jobanyń biregeıligi men qarjylandyrý kólemi turǵyndardyń jobalarǵa belsendi qatysýyna jáne olardyń júzege asýyna jol ashady.
Odan bólek, forýmǵa qatysýshylarǵa arnalyp, eldegi áleýmettik kásipkerlik, qarjy, psıhologııa, sáýlet jáne qurylys salalaryndaǵy jetekshi sarapshylardyń trenıngteri men sheberlik sabaqtary josparlanǵan. Memlekettik organdar jáne bıznespen birlesip, qaýymdastyqtar qurý jónindegi sheberlik sabaǵy da bar. Forým meımandary bastamanyń «Ideıadan iske asqanǵa deıingi» barlyq satysymen jiti tanysa alady.
– «Tugan Qala» bastamasy – erekshe qyzyqty keıs. Barlyq monoqalanyń ortaq problemasy – ınfraqurylym. Al bul bastama shaǵyn qadamdarmen úlken is tyndyryp, qalany damytýǵa sep. Saıabaq, aıaldama, mýral – eldi mekenderdiń kórki. Osyndaǵy adamdardyń kózine shýaq úıirip, kóńilin jaqsy isterge burady. ERG kompanııasynyń bul tájirıbesinen alarymyz kóp, – dedi KAZ Minerals ókili Ermek Dúzkenov. Hromtaýlyqtar ózderi jasaǵan buıymdar men bar aspazdyq ónerin salǵan taǵamdar jármeńkesi qalanyń mádenıeti men ózindik ereksheligin daralaı tústi. Meımandar Hromtaýdyń dámin tatyp, ózderine unaǵan qolóner buıymdaryn satyp ala aldy.
Forým qorytyndysynda onlaın-baıqaý men kvest jeńimpazdary marapattalyp, olarǵa estelik syılyqtar men dıplomdar tabys etildi.
«Tugan Qala» jobasy – ERG jyl saıyn oblys ákimdikterimen arada jasasatyn memorandýmdar aıasynda bólingen qarajattyń qaıda baǵyttalatynyn turǵyndardyń sheshýine múmkindik beretin bastama. Túpki maqsat – kásiporyndardan túsken qarajattyń qaı ınfaqurylym nysandaryna jumsalýǵa tıis ekenin jáne qalada qandaı nysandar salynatynyn turǵyndardyń ózderi anyqtap, sol arqyly qalanyń damýyna tikeleı ózderiniń atsalysýyna jol ashý.
Bastama Hromtaý, Aqsý, Rýdnyı qalalary men Qashar jáne Oktıabr kentterinde iske asyrylyp jatyr. Bıyl Lısakovsk qalasynan da ótinimder qabyldandy. Jalpy, «Tugan Qala» jobasy 2019 jyly qolǵa alyndy. Onyń aıasynda búginge deıin 144 áleýmettik nysan salynyp, iske qosylǵan. Olardyń qatarynda balalar men sport alańdary, art-nysandar men ınklıýzıvti jaǵajaı, shańǵy roller joly jáne t.s.s. bar. «Tugan Qala» jobasy aıasyndaǵy bastamalardy iske asyrýǵa ERG búginge deıin jalpy somasy 690 mln teńgeden astam qarajat jumsaǵan.
Aqtóbe oblysy,
Hromtaý qalasy
