foto Senattyń baspasóz qyzmeti
Senator kezdesýde bul jobanyń Qazaqstanǵa asa mańyzdy ekenin atap ótti.
«Bizde atom elektr stansııasyn salýǵa barlyq obektıvti alǵysharttar bar. Ol, birinshiden, Qazaqstandy osy mańyzdy shıkizatty óndirý boıynsha kóshbasshylardyń birine aınaldyratyn ýrannyń baı qory. Ekinshiden, bizde ýrandy qaıta óńdeýge arnalǵan damyǵan ınfraqurylym bar, bul resýrstardy tıimdi paıdalanýǵa jáne atom elektr stansııasyn salý shyǵyndaryn azaıtýǵa múmkindik beredi. Sonymen birge, bizde jobany qajetti tehnologııalar men ınnovasııamen qamtamasyz ete alatyn qýatty ǵylymı baza bar. Osy faktorlardyń barlyǵy elimizge osy aýqymdy jáne mańyzdy jobany iske asyrýǵa senimdi irgetas jasaıdy», dedi Qanıev.
Senator atom elektr stansııasynyń qurylysy elimizdiń energetıkalyq qaýipsizdigin qamtamasyz etýge jáne jer qoınaýynan alynatyn energııa kózderine táýeldilikti azaıtýǵa baǵyttalǵan mańyzdy qadam bolýy múmkin ekenin aıtty. Sonymen qatar jańa elektr stansııasy salynsa jumys oryndary ashylyp, ınvestısııa tartylatyny aıtyldy.
Shalqar aýdanynyń turǵyndary taqyrypty qyzý talqylady. Olar depýtattarǵa AES-ti paıdalaný qaýipsizdigi, qorshaǵan ortany qorǵaý jáne jobanyń áleýmettik áseri týraly kóptegen suraqtar qoıdy.
