Talaı naýqastyń ómirin uzartatyn keleli jıyndy uıymdastyrýǵa Kardıologııa jáne ishki aýrýlar ǴZI, «University Medical Center» korporatıvtik qory men Qazaqstan júrek qyzmetiniń jetkiliksizdigi qoǵamy uıytqy boldy.
S.Asfendııarov atyndaǵy Qazaq Ulttyq medısına ýnıversıtetiniń rektory Marat Shoranov: «Sozylmaly júrek qyzmetiniń jetkiliksizdigi dertin emdeý densaýlyq saqtaý júıesi men jalpy qoǵam úshin asa ózekti. Osy keselmen naýqastardy aýrýhanaǵa túsetinder men ólim-jitim sanynyń artýy, emdeý men ońaltýǵa ketetin qomaqty shyǵyndar densaýlyq saqtaý júıesine aıtarlyqtaı salmaq salady», - dedi.
Degenmen, Marat Shoranov údemeli júrek qyzmeti jetkiliksizdigin emdeýde aıtarlyqtaı jetistikterge qol jetkizilgenine toqtala kele: «Jańa dári-dármekter, ınnovasııalyq tehnologııalar, ımplantasııa qurylǵylary paıda boldy, júrek transplantasııasy damyp jatyr. Alaıda, bizdiń aldymyzǵa erte satysynda dıagnostıka jasaý, pasıentterdiń emdelýge beıimdiligin arttyrý, júrek qyzmeti jetkiliksizdiginiń boljamyn jaqsartý úshin jańa joǵary tehnologııalyq qurylǵylardy engizý sııaqty mańyzdy máseleler tur», - dedi.
QR Kardıologııa jáne ishki aýrýlar ǴZI Basqarma tóraǵasy Marat Pashımovtyń aıtýynsha, sozylmaly júrek qyzmetiniń jetkiliksizdigi – júrek-qan tamyrlary aýrýlarynyń jıi kezdesetin asqynýlarynyń biri. Bul kesel densaýlyqty nasharlatyp, qatardan qaldyryp qana qoımaı, erte kóz jumýǵa basty sebepkerdiń biri bolyp otyr. Sondyqtan búgingi ótkizilip otyrǵan konferensııa asa ózekti. Otandyq, sheteldik kardıologııa jáne kardıohırýrgııa mamandarynyń SJJ bar pasıentterdi dıagnostıkalaý men emdeýdegi ózara is-qımyly men tájirıbe almasýy pasıentterimizdiń ómirin uzartyp, jaǵdaıyn jaqsartyp, naýqastarǵa kómek kórsetý júıesin neǵurlym joǵary deńgeıge kóterýge múmkindik beredi.
UMC Basqarma tóraǵasynyń orynbasary Mahabbat Bekbosynova údemeli júrek jetkiliksizdigi boıynsha jumys toby Pasıentterdi basqarýdyń biryńǵaı baǵdarlamasy men klınıkalyq hattamasy ázirlegenin, Qan aınalymyn mehanıkalyq qamtamasyz etýde naýqastardyń biryńǵaı tizilimi jasalǵanyn, ımplantasııalanǵan qurylǵysy bar naýqastardyń biryńǵaı kútý júıesi qurylyp jatqanyn aıtty. «Bul sharalardyń barlyǵy zamanaýı standarttar men ozyq klınıkalyq tájirıbelerdi eskere otyryp, pasıentterge kútim kórsetýdi ońtaılandyrýǵa jáne emdeý nátıjelerin jaqsartýǵa baǵyttalǵan», - dedi dáriger.
Konferensııa aıasynda seksııalyq otyrystar aıasynda qatysýshylar LVAD ımplantasııasyna pasıentterdi qalaı irikteletindigin aıtyp, Astana, Almaty, Shymkent pen Taraz qalalarynda ımplantasııa jasaý tájirıbesimen bólisti (LVAD tek osy qalalarda jasalady), operasııadan keıingi kezeńniń negizgi erekshelikterin, ambýlatorııalyq jaǵdaıda pasıentterdi baqylaý máselelerin, sondaı-aq LVAD ımplantasııasynan keıin pasıentterge kútim jasaýdaǵy meıirgerlerdiń róli jáne t.b. máselelerdi talqylady.
Búgin Kardıologııa jáne ishki aýrýlar ǴZI-da pasıentterge keńes berý, LVAD mehanıkalyq qurylǵysy men Mitraclip ımplantasııalaý operasııalary boıynsha sheberlik dáristeri ótip jatyr. Máselen, mitraclip operasııasyn Almatyda alǵash ret professor Maurizio Taramasso (Sıýrıh, Shveısarııa) basshylyǵymen júrgiziledi. Bul MitraSlip júıesiniń kómegimen mıtraldy qaqpaqshanyń endovaskýlıarlyq klıpteý. MitraClip ashyq hırýrgııalyq operasııa jasaýǵa bolmaıtyn pasıentterge júrek jumysyn jaqsartýdyń jalǵyz múmkindigi. Bul az ınvazıvti prosedýrany qoldaný pasıenttiń qalpyna kelý kezeńin qysqartýǵa múmkindik beredi, naýqastyń jaǵdaıynyń jaqsarýy anestezııadan shyqqannan keıin birden seziledi. Naýqastar tez jazylady. Olardyń ómir súrý sapasy edáýir jaqsarady, entigý azaıyp, jattyǵýlarǵa tózimdilik artady, medısınalyq kómekke júginý jıiligi tómendeıdi. Aıta ketý kerek, 2020 jyly MitraClip qurylǵysy eń jaqsy medısınalyq tehnologııa retinde Rrix Galien USA (Nobel syılyǵynyń balamasy) syılyǵymen marapattalǵan.
Al LVAD ımplantasııalaý operasııasy Ankara (Túrkııa) professory Umit Kervan qatysýymen SJJ dıagnozymen júrek qyzmeti tómendegen 51 jastaǵy pasıentke jasaıdy.
ALMATY
