Foto: QR Mádenıet jáne aqparat mınıstrligi
Aıta keterligi, qos mereıtoı qara shańyraqtyń 90 jyldyǵy men Ahmet Jubanov-Latıf Hamıdıdiń «Abaı» operalyq spektakliniń 80 jyldyǵy tuspa-tus kelgen maýsym esten ketpes mereke syılaǵan.
Jaqsynyń jaqsylyǵy atalyp, qýanyshtan kóńil tasyǵan maýsymasharda teatr ujymy aqsaqaldaryna qyzyl kilem tósep, qoshemetpen qarsy alǵan. Marapattalǵan ardagerler on jyldan astam ýaqyt boıy qara shańyraqta úzdiksiz eńbek etken mamandar. Olardyń qatarynda tek sahna ártisteri ǵana emes, kostıým sehy, grım mamany, jaryq qoıýshy sııaqty teatrdyń barlyq bóliminiń burynǵy qyzmetkerleri bar.
Qurmetti qonaqtar qatarynda ultymyzdyń mańdaıyna bitken jaryq juldyzdary KSRO Halyq ártisi jáne Memlekettik syılyq ıegeri Bıbigúl Tólegenova, Qazaq KSR Halyq ártisi jáne Qazaq KSR Memlekettik syılyǵynyń ıegeri Raýshan Baıseıitova, Qazaqstan jáne Tatarstan Halyq ártisi Nurjamal Úsenbaeva jáne basqa opera men balet maıtalmandary, Qazaqstandaǵy dıplomatııalyq elshilikterdiń qadirli ókilderi bolǵan.
«Abaı atyndaǵy teatr «Ǵasyr aldyndaǵy jańa beleske» aıaq basty. Áne-mine degenshe, aldaǵy 10 jylda qara shańyraǵymyz júz jasaıdy. Osymen 90 jylǵa núkte qoıylatyn tarıhı kúnde ardagerlerdiń basyn qosyp, eńbegine raqmet aıtyp laıyqty qurmet kórsetý, búgingi óskeleń urpaqtyń, óner ujymynyń birden-bir paryzy dep esepteımin. Nege deseńiz, adam eńbegi birinshi kezekte uıym tarapynan, odan ary qaraı qoǵam, memleket tarapynan baǵalanyp turǵany mańyzdy. Bul ásirese óner adamyna shabyttaný úshin asa qajet, sondyqtan Abaı atyndaǵy teatrda jańa úrdis – óz qyzmetkerleriniń eńbegin jylda atap ótetin ádemi dástúr jol tartty», dedi Abaı atyndaǵy QazUOBT dırektory Aınur Kópbasarova.
Teatr ardagerlerin marapattaý saltanatynda asyldyń tuıaǵy Raýshan Hatııatqyzy anasynyń asa baǵaly portreti men kezinde Kúlásh Baıseıitovanyń spektaklderde kıgen birneshe bas kıimin óner ordasynyń murajaıyna tartý etken. Qazaq KSR Eńbek sińirgen óner qaıratkeri Nıkolaı Sıvchınskıı salǵan sýret buryn-sońdy esh jerde jarııalanbaǵan jáne onyń erekshe tarıhy bar.
Maýsymasharda qonaqtarǵa shaǵyn mýzykalyq tartý jasalyp, merekeli kesh Ahmet Jubanov-Latıf Hamıdıdiń «Abaı» operasyn tamashalaýmen aıaqtalǵan.
Osylaısha, Abaı atyndaǵy Qazaq ulttyq opera jáne balet teatry óziniń «Ǵasyr aldyndaǵy jańa belesin» – 91-shi maýsymyn bastady. Dástúrge saı jańa maýsymnyń ekinshi kúninde P. Chaıkovskııdiń «Aqqý kóli» balettik spektakli kórermenge jol tartqan.
