Aqtóbeden kóship kelgen Aıgúl men Qojabergen Qojamuratovtar bul óńirde nendeı kásipti qolǵa alý kerek ekenin uzaq zerdeleıdi. Qojabergen keshegi keńes zamanynda Almatydaǵy «Mereı» jıhaz fabrıkasynda jumys istep, baı tájirıbe jınaǵan. Jańa qonysta osy biligi kóp-kórim kádege asty.
Sehta jeti adam jumys isteıdi. Shetelden ákelingen stanoktar ornatylǵan. Etek-jeńi keń pishilgen selonyń árbir turǵynynyń úıinde jergilikti sehtan shyqqan jıhazdar tur. Ajarly ári arzan jıhazdary birer jyldyń ishinde aýdan asyp, oblysqa taraǵan. Ornatyp berý úshin seh sheberleri birge barady. Olardyń jolaqysy, as-sýy tólenedi. Eńbekaqylary atqarǵan sharýalaryna oraı. Eń tómengi tabys – 200 myń teńgeniń tóńireginde. Aýyl adamdary úshin az jalaqy emes.
«Biz tapsyrys boıynsha da jıhazdyń kez kelgen túrin daıyndaımyz. Áleýmettik jeli arqyly da jumys isteımiz. Qazir satylym jaǵynan aldyńǵy qatardamyz. Jasaǵan jıhazdarymyz naryq qunynan 20-30 paıyzǵa arzan», deıdi Aıgúl Qojamuratova.
Aıgúldiń ózi sehtyń esep-qısabyna ıe, sonymen birge, árleýshi dızaıner. Bul taraptaǵy bar jańalyqty, suranysty aqyl tarazysyna salyp, ozyq úlgilerdi muqııat qadaǵalap otyrady. Sondyqtan tutynýshylar tarapynan ókpe-renish týyndaǵan emes.
«Jıhaz sehyna jumysqa ornalasqan kezde qobaljyǵanym ras. Qazir kez kelgen jumysty erkin atqaramyn. Brıgadadaǵy sheberlerdiń bári ózderi jetildirip, sheberlikterin shyńdap kele jatqan jigitter. Jastar jaǵy qoǵamǵa paıdaly osyndaı isti meńgergenderi jón dep esepteımin», deıdi seh sheberi Eldar Dúzbenbetov.
Taǵy bir aıta keter dúnıe, jıhaz sehy alǵashqy kúnnen bastap úzilissiz jumys isteıdi. Kásipkerdiń uly Janqoja otbasylyq bıznestiń qyr-syryn meńgerip, ata-anasy bastaǵan isti alǵa jyljytýda. Taıaýda óndiristi keńeıtý maqsatynda «Damý» qoryna ótinim tapsyrypty. Qolyna qarajat tıse, jıhazdyń ózindik qunyn arzandatý baǵytynda umtylys jasamaq.
Aqmola oblysy,
Jaqsy aýdany
