Aýyl sharýashylyǵy basqarmasy basshysynyń orynbasary Tólebek Qulekeevtiń aıtýynsha, bıyl 523,4 myń múıizdi iri qara, 3,8 mln ýaq mal, 184,9 myń jylqy jáne 7,7 myń túıe qystaýǵa túsedi. Sharýalardyń ýaqtyly qamdanýynyń arqasynda óńirde jemshóp qory jetkilikti deńgeıde jınalǵan. Mal azyǵyn daıyndaý jumystary ýaqtyly ári qarqyndy júrgizilgen. Bul iske on aýdannyń jergilikti atqarýshy bıligi de judyryqtaı jumylǵan.
«О́ńir boıynsha 2,6 mln tonna pishen, 99 myń tonna pishendeme, 88 myń tonna súrlem, 470 myń tonna saban, 353 myń tonna qunarly jem daıyndaý josparlanǵan edi. Ýaqtyly bastalǵan bul jumys óz nátıjesin berip otyr. Qyrkúıek aıyna deıin 303 myń gektar jerdegi shóp shabylyp, qajetti 2,6 mln tonna pishen, 99 myń tonna pishendeme, 472,4 myń tonna saban jınaldy. Budan bólek, mal azyǵy retinde 152,8 myń tonna dándi daqyl bólindi. Súrlem jınaý jumystary da josparǵa sáıkes júrgizilip jatyr», deıdi T.Qulekeev.
Mal baqqan sharýalar byltyr ár malǵa 12 sentnerden mal azyǵyn jınaǵan. Soǵan qaramastan jambyldyq sharýalar qaharly qys mezgilinen qysylmaı shyqty. Al bıyl árbir shartty malǵa 19 sentnerden mal azyǵy daıyndalyp jatyr. Ázirlengen mal azyǵynyń basym bóligi qystaý oryndaryna jetkizilýde.
Arnaıy qurylǵan jumys toby barlyq aýdanǵa jumys saparymen baryp, der kezinde jınalǵan jemshóp qoryna zerdeleý jumysyn júrgizedi eken. О́ńirde bir túp pishen 500-650 teńge aralyǵynda satylsa, qunarly jemniń bir kılosy 60-68 teńge kóleminde ótkerilip jatyr.
О́ńir boıynsha 5 862 mal qystatý orny bar. Atalǵan qystaqtardyń 1 202-si shalǵaıdaǵy jaıylymdarda ornalasqan. Malshylarǵa arnalǵan 5 564 turǵyn úı jóndeýden ótkizilip jatyr. Bul úıler az kún ishinde malshylardy qabyldaýǵa tolyqtaı daıyn bolady.
Al mal azyǵy baǵasynyń negizsiz kóterilmeýin óńir basshysy Erbol Qarashókeevtiń ózi jeke qadaǵalaýyna alyp otyr.
Jambyl oblysy
