Jartylaı aýyr salmaqta kúsh synasyp júrgen «Tobet Top Team» klýbynyń múshesi Dııar Nurǵojaı 2017 jyldyń sońynda kásipqoılar arasyndaǵy alǵashqy jekpe-jegin ótkizdi. Sol kezden beri 10 ret oktagonǵa shyǵyp, barlyq báseke de jeńiske jetti. Tarqatyp aıtsaq, Almanbet Nurálıev, Sultan Musaev, Sergeı Baryshev, Serjıo Soýzany uryp jyqsa, Hasan Bozor men Abbosbek Ýsarovty sabmıshn ádisimen jeńdi. Al Magomed Magomedov pen Konstantın Andreısevti upaı sanymen utty. Cońynda esimderi atalǵan tórt qarsylasymen ol ataqty Habıb Nurmagomedov irgetasyn qalaǵan «Eagle» promoýsheninde aıqasty. Nurǵojaı sol uıymnyń chempıondyq belbeýin de ıelendi.
Qarsylasyn bet qaratpaı jeńip júrgen jigitke kóp keshikpeı UFC-diń qyraǵy mamandary nazar aýdardy. Sodan olar Dııardy Dana Ýaıttyń shoýyna shaqyrdy. Byltyrǵy jyldyń mamyr aıynda qandasymyz Ábý-Dabıde uıymdastyrylǵan dúbirli doda kezinde PFL men Bellatorda óner kórsetken Argentınanyń azýly sportshysy Emılıan Sordıge (25-13-1, 23 KO) san soqtyrdy. Bul báseke birinshi raýndta toqtatyldy. Al keshe Las-Vegasta Nurǵojaı Polshanyń myqtysy Bartosh Shevchýkpen (8-3-1, 7 KO) sheberlik baıqasty. Bul joly da qazaq faıteri básekeni uzaqqa sozǵan joq. Shyqqan bette tizgindi qolǵa alǵan Dııar ekinshi raýndta qarsylasyn basynan teýip qulatyp, odan keıin oǵan aýyr-aýyr soqqylaryn darytty. Araǵa taǵy da tóreshiler tústi.
BAÁ men AQSh-taǵy jarqyn jeńisteriniń arqasynda Dııar Nurǵojaı UFC-men kelisimshartqa otyrdy. Esterińizge sala keteıik, bul kúnderi atalǵan promoýshende Shavqat Rahmonov, Asý Almabaev, Azat Maqsum, Bekzat Almahan, Nıkolaı Veretennıkov aıqasyp júr. Olardan bólek, Qytaıda dúnıege kelgen Qaısar Maqsat pen Saıran Nurdanbek syndy qandastarymyz bar. Sál erterekte Damır Ismaǵulov, Jalǵas Jumaǵulov, Sergeı Morozov, Marııa Agapova da sol uıymda óner kórsetti.
