Foto: baq.kz
Oblystyq prokýratýranyń málimetinshe, esirtki bıznesimen kúreske baǵyttalǵan «Nashaqorlyqqa jol joq» jobasy júzege asyrylyp jatyr. Sondaı-aq vedomstvoaralyq top qurylǵan. Osy jumystyń nátıjesinde esirtki zattaryn nasıhattaıtyn 7 myńnan astam jarnamalyq saıttar anyqtalyp, buǵattalǵan. Esirtki zattaryn belgili jerlerde qaldyrýshylardyń kóshelerdegi jarnamalyq jazbalary men graffıtılerin boıaý sharalary qoldanylǵan.
«Esirtkini jarnamalaý úshin 55 qylmystyq is qozǵaldy. Áleýmettik jelilerde, onyń ishinde 98 Telegram-kanaldarda mazmuny zańǵa qaıshy jáne zańsyz áreketterge shaqyratyn 174 silteme buǵattaldy», delingen habarlamada.
Budan bólek aýyldyq jerlerde jabaıy qarasorany anyqtaý jáne joıý jumystary belsendi túrde júrgizilip jatyr. Joba barysynda Osakarov, Nura jáne Qarqaraly aýdandarynda 200-den astam qarasora butalary joıylǵan.
Sonymen qatar jastardy aqparattandyrý jáne aldyn alý jumysyna tartý maqsatynda prokýratýra stýdentter úshin sot otyrystarynyń onlaın-translıasııasyn uıymdastyrǵan.
Keńes qorytyndysy boıynsha esirtki bıznesine qarsy kúres jáne nashaqorlyqtyń aldyn alý boıynsha qosymsha sharalar bekitildi.
