Bıyl 178 kásipker qaıtarymsyz grantqa ıe boldy. Olarǵa jalpy 262,5 mln teńge qarjy bólingen. Ár kásipkerge eń kóbi 1 1480 000 teńge qarjy taǵaıyndalǵan. Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova bul jolǵy granttyń kóbin kópbalaly otbasyndaǵylar aldy deıdi.
– «Bastaý Bıznestiń» granty kásibin jańa bastaǵan kásipkerlerge ózderiniń bıznes-áleýetin ashyp, óndirisin jolǵa qoıyp, ony damytyp, sol arqyly ózin turaqty tabyspen, ózgeni jumyspen qamtýǵa múmkindik berip otyr. Bıyl 106 otbasy grantqa qol jetkizip, ózderiniń túrli kásibin jolǵa qoıdy. Qalǵan 44-i – múmkindigi shekteýli janǵa, 18-i – erekshe balalardy ósirip otyrǵan ata-anaǵa, 6-aýy – asyraýshysynan aıyrylǵanǵa, 4-eýi ataýly áleýmettik kómek taǵaıyndalǵandarǵa úlestirildi, – deıdi Ásem Aıtjanqyzy.
Grantty ıelengender jıhaz sehy, etnokıim tigin ortalyǵy, sán salony, kondıter sehy, ystalǵan et, tez tamaqtaný orny, avtobólshek dúkeni, sabyn sehy, mal bordaqylaý alańy, metall qurastyrý sehy, medısına kabıneti, massaj kabıneti, sport klýby, aıaqkıim sheberhanasy, jylyjaı, naýbaıhana, shashtaraz, sút ónimderi, shujyq, veterınarııalyq dárihana, qus sharýashylyǵy, plastıkalyq tereze men esik óndirisi, monsha sekildi halyq suranysyna ıe kásipterin dóńgeletedi.
Buqar jyraý aýdany, Doskeı aýylynyń turǵyny Danııar Tatyǵulovqa «Bastaý Bıznesten» oqyǵan sertıfıkaty serpin berip, «2024-2029 jyldarǵa arnalǵan eńbek naryǵyn damytý tujyrymdamasy» sheńberinde memlekettik grant alǵan. Birden oılastyryp júrgen qus fermasyn qolǵa aldy. Grant qarajatyna sharýasyna qajetti syıymdylyǵy 2 000 jumyrtqa bolatyn ınkýbator, vakýýmdyq tyǵyzdaǵysh, etti ystap, pisiretin pesh, muzdatqysh satyp alǵan. Kásipker qazir bódene ósirip jatyr.
– Otbasymmen aqyldasa kele eti únemi ótimdi qus fermasyn ashaıyq dep sheshtik. Memlekettiń qoldaýy oıymyzdyń júzege asýyna kádimgideı sep boldy. Sóıtip tártip-talabyna saı qujattardy ótkizip, konkýrsqa qatysyp, 1 476 800 teńge aldyq. Bódeneniń etin tuzdap, ystap, saýdalap kóremiz. Shaǵyn kásibimiz dóńgelep jatsa, aýyldaǵy bir-eki adamǵa jumys beremiz. Aýyldaǵy estip-bilgender qazirdiń ózinde ónimdi surap jatyr. Soǵan qaraǵanda kásibimiz órken jaıady dep otyrmyz, – deıdi kópbalaly áke.
Úshtóbe aýylyndaǵy úsh balanyń anasy Ásemgúl Elýbaeva da grant ıegeri atanyp, irimshiktiń túr-túrin ázirlep, qolynan shyqqan ónimin saýdalap otyr.
– Osyndaı grantqa qol jetkizý múmkindigi baryn jaqynymnan estip, arnaıy kýrstan bilim jetildirdim. 1 500 000 teńge qarajatqa qajet jabdyqtardy satyp aldym. Tabıǵı ónimge qashanda suranys bar. Aýyldyń ózinde jedel ótip ketedi. Irimshikti ázirleý tehnologııasyn erteden bilemin. Granttyń arqasynda kásibim keńeıip, tapsyrysym kóbeıdi, – deıdi grant ıegeri.
Gúlnur Baltabaeva grant arqyly shelkografııa ádisi jáne DTF prınter kómegimen ulttyq naqyshty ázirleıtin bıznes ortalyǵyna orasan paıda ákeldi. Qolónershi DTF prınterdi baǵdarlamasymen birge 700 myń teńgege satyp alǵan. Onymen qosa, noýtbýk, kópfýnksıonaldy termopresske de qol jetkizgen.
– Búgingi kúni «Asyl mura» óner mektebindegi «Asyl mura» kúıshiler ansambliniń tapsyrysyn oryndaý ústindemiz. Jaqynda Tashkentke konkýrsqa barady. О́nerpaz balalardyń kıimine qazaqy naqysh salyp jatyrmyz. Tapsyrys kún ótken saıyn kóbeıip jatyr, – deıdi kásipker kelinshek.
Qaraǵandy oblysy
