Foto: Astana qalasy ákimdiginiń baspasóz qyzmeti
Respýblıka partııasynyń uıymdastyrýymen ótken bul is-sharada 40 oıynshy baq synady. Týrnırdiń fınaldyq kezeńine 17 oblys, 3 megapolıstegi irikteýdiń qorytyndysyna sáıkes, 21 jastan asqan 2 myńǵa jýyq qatysýshynyń arasynan 1-2 oryn alǵan 40 sportshy ǵana joldama aldy.
«Osyndaı týrnırdi uıymdastyrý ıdeıasy jarty jyl buryn týyndap, aımaqtarda irikteý jarystaryn ótkizdik. Asyq atý – kópshiliktiń jadynda aýyl balalarynyń kúndelikti oıyny retinde saqtalyp qalǵan. Ulttyq oıynymyzdy buqaralyq deńgeıge kóterý maqsatynda, bas júldege avtokólik tigý arqyly qyzyǵýshylyqty arttyrǵymyz keldi. Irikteý kezeńderinde de júldegerler aqshalaı syıaqymen marapattaldy. Osy týrnırdi aldaǵy jyldary dástúrge aınaldyrsaq jáne jasóspirimderdi de qamtysaq degen josparymyz bar. Sebebi jas býyndy qazirden úlken dodalarǵa daıyndaı berýimiz kerek. Jarys barysynda básekelestik óte joǵary boldy. Ádil bolý úshin, arnaıy kamera da qoıdyrdyq. Jańa esimderdi shyǵaryp, olarǵa múmkindik berý - mindetimiz», dedi «Kóshpendilerdiń Asyq sporty» halyqaralyq federasııasynyń prezıdenti Oljas Quspekov.
Nátıjesinde myńnan oza shapqan Ánýarbek Nurjigit JAC temir tulparyn tizgindese, kúmis júldeger Nurlan Jomart 1 000 000 teńge syıaqy aldy. Al qola júldeger Ǵaryshbek Qulybek 500 000 teńge syıaqymen marapattaldy. Jeńiske degen jigeri úshin Jetisý oblysynyń ókili Qastaı Manasqa arnaıy kýbok berildi.
