«Saltanat» memlekettik bı ansambli qazaq bıin jańa taqyryptarmen, beınelermen baıytyp, sheńberin keńitti ári qazirgi ulttyq sahnalyq bıdiń negizderin damytty. Búgingi tańda «Saltanat» memlekettik bı ansambli ulttyq horeografııa mádenıetiniń baı murasyn jáne álemdik horeografııanyń alýan túrliligin tolyq nasıhattaı alatyn jalǵyz kásibı bı ujymy bolyp otyr.
Aty ańyzǵa aınalǵan ansambldiń 70 jylǵa jýyq ǵumyrynda ujym quramynda san myńdaǵan kásibı bilikti balet ártisteriniń úlken shoǵyry eńbek etip, jas bıshilerdiń birneshe býyny óz sheberlikterin shyńdady. Gastroldik saparmen Túrkııa, Reseı, Belgııa, Ońtústik Koreıa, AQSh, Fransııa elderine baryp, qazaq halqynyń ulttyq ónerin, dástúrin, halyq bıi men álem halyqtarynyń bılerin pash etti. Bıyl da ansambl úshin jemisti jyl boldy. 23 qyrkúıek kúni Reseı eliniń mádenı astanasy Sankt-Peterbýrg qalasynda ótken «Baltııskıı dom» teatr-festıvaline usynǵan túrli ult arasyndaǵy dostyq, birlik pen tatýlyqty nasıhattaıtyn konserti joǵary deńgeıde ótti. Alpysqa jýyq óner sheberi men balet ártisi qatysqan festıvaldi «Saltanattyń» juldyzy joǵary boldy. Al ónerli ujymnyń elorda halqyna ákelgen jańa konserttik baǵdarlamasynda qazaqtyń ulttyq bıimen álem halyqtarynyń bılerin úzdik úndestikte usynyp, kópshilik joǵary baǵalady. –Respýblıka kúni merekesi halyqpen qaıta qaýyshqaly bul kúnniń mańyzy men mánin odan saıyn uǵyna tústik. Osynaý dárgeıi joǵary ulttyq merekeni tý etken «Salatanat» memlekettik bı ansambliniń sizderge arnap ákelgen tamasha tartýy kóńilderińizden shyǵyp, kásibı bı óneriniń qudireti men qasıetin jan-jaqty qyrynan áıgileı aldy ǵoı dep oılaımyz, – dep áńgimesin bastaǵan ansambldiń kórkemdik jetekshisi Qýanyshbek Tólegen ári qaraı: – Sulý da symbatty Alataý bókterinen aıbyny asqaq Arqaǵa kelgen saıyn erekshe shabytqa bólenemiz. Elordaǵa tabanymyz tıgende shyǵarmashylyq jańalyǵymyzben bólisip, ónerdi baǵalaıtyn kórermenniń qoshemetin kórgende bir marqaıyp qalamyz. Búgingi «Kún dıdarly Qazaqstan» atty konsertimizde repertýarymyzǵa jańadan engen bılerdi, qazaqtyń ulttyq jáne álem halyqtarynyń bılerin, sonyń ishinde Azııa halyqtarynyń bılerin toptastyrýǵa tyrystyq. О́zderińizge usynǵan baǵdarlamamyz da «Azııa ańyzdary» dep ataldy, – dep sózin túıindedi ártis.
Iá, bı óneri – tutas ulttyń tarıhynan, ótkeni men búgininen syr shertip, bolashaqqa bastaıtyn segiz qyrly, bir syrly ǵajaıyp óner. Ár bı qoıylymynyń astarynda sol halyqtyń arman-maqsaty, uly muraty men erteńge degen senimi jatyr. Bı degen jaı qımyl-qozǵalys emes, sol halyqtyń salt-dástúrinen, tanymy men talǵamynan habar beretin óner. Qalıbek Qýanyshbaev atyndaǵy Qazaq ulttyq mýzykalyq drama teatrynda uıymdastyrylǵan keshtiń shymyldyǵy premera «Samǵaý» qoıylymymen ashyldy. Atap aıtsaq, ansambl mońǵol bıi «Venzelıa», ózbek bıi «Horezm termálári», «Kóńildi serýen», «Jastyq jalyn», tájik bıi «Idona», uıǵyr bıi «Dolan», koreı bıi «Kalchým», tatar bıi «Jenıhı», qytaı bıi «Liming», sonymen qatar «Jaryq», «El saltanaty», «Qyz qýý» syndy erekshe bı qoıylymdaryn usyndy.
Bekzat óner saltanat qurǵan mazmundy keshte halyqaralyq jáne respýblıkalyq baıqaýlardyń laýreattary Birjan Aıtahmet, Asylhan Shalqarov ánnen shashý shashty. Táýelsizdiktiń tal besiginde terbelip, qyran qusy qalyqtaǵan kók aspanymyzdyń astynda Mádenıet salasynyń úzdigi Rahat Sársenov dombyranyń únin áýeletse, aspapty janyna serik etken Aıgerim Elemesova kópshiliktiń ystyq yqylasyna bólendi.
Tarıhy tereń ansambldiń Respýblıka kúnine arnalǵan konsertine kelgen Astana qalasynyń turǵyndary men qonaqtary sheksiz qoshemet kórsetip, jyly lebizderin bildirdi. Kesh sońynda ujymǵa Mádenıet jáne aqparat mınıstrligi men «Gúlder» ansambliniń atynan yqylas gúli tabystaldy.
Aıta keteıik, saf ónerimen tanylyp, álemge qazaqtyń bıin nasıhattap júrgen «Saltanat» memlekettik bı ansambli keler jyly 70 jyldyq mereıtoıyn atap ótedi. Talaı daryn ansambldiń aıaǵynan tik turyp, qalyptasýyna eńbek sińirdi. Qazirgi tańda jas býyn ókilderi de sol sara joldy ári qaraı jalǵap, qazaq óneriniń kókjıegin keńeıtýge atsalysyp júr.
