Foto: Aqorda
«Sizdiń saparyńyz Qazaqstan men Halyqaralyq dzıýdo federasııasy arasyndaǵy ózara yqpaldastyqqa tyń serpin berý turǵysynan óte mańyzdy dep sanaımyn. Búginde dzıýdonyń álemdik sport qoǵamdastyǵynda alatyn orny zor. Dzıýdo Qazaqstanda da óte tanymal sport túri. Elimizde kóptegen seksııa men jattyǵý ortalyqtary jumys isteıdi. Onda 160 myńnan asa adam, solardyń ishinde balalar da jattyǵady. Jaqynda ótken Parıj Olımpıadasynda Eldos Smetovtiń jeńimpaz atanǵanyn maqtan tutamyz. Sondyqtan biz Halyqaralyq dzıýdo federasııasymen qarym-qatynasty órkendetip, yntymaqtastyqty jandandyrýǵa nıettimiz», dedi Memleket basshysy.
Marıýs Vızer Qazaqstanda dzıýdony damytýǵa qoldaý kórsetkeni úshin Qasym-Jomart Toqaevqa alǵys aıtty.
«Qazaqstanǵa kelý – men úshin úlken mártebe. Sizge jáne elińizge dzıýdoǵa ǵana emes, áleýmettik ıntegrasııanyń jáne beıbitshiliktiń birden-bir tetigi sanalatyn sporttyq qozǵalysqa qoldaý kórsetkenińizge rızashylyǵymdy bildiremin. Dzıýdo qaýymdastyǵynyń barlyq múshesi ortaq maqsatqa jumylady. Bul – qoǵamda laıyqty orny bar azamat tárbıeleý», dedi Marıýs Vızer.
Ol Astanada Halyqaralyq dzıýdo federasııasynyń uıytqy bolýymen IJF akademııasyn ashý josparlanyp otyrǵanyn jetkizdi. Bul aımaqtaǵy joǵary sanatty jattyqtyrýshylar men tóreshilerdi daıarlaıtyn ortalyqtardyń biri bolmaq.
Qasym-Jomart Toqaev pen Marıýs Vızer Qazaqstannyń Halyqaralyq dzıýdo federasııasymen uzaqmerzimdi yntymaqtastyǵynyń perspektıvasy jóninde pikir almasty. Budan bólek, 2027 jyly elimizde ótetin dzıýdodan Álem chempıonatyna daıyndyq máselelerin pysyqtady.
Kezdesý sońynda Memleket basshysy Qazaqstanda dzıýdony ilgeriletýge qosqan úlesi úshin Marıýs Vızerdi II dárejeli «Dostyq» ordenimen marapattady.
