Foto: domly.info
Prokýratýra organdary turǵyn úı qurylys salasynda úleskerlerdiń aqshasyn zańsyz tartý faktilerin anyqtaý maqsatynda turaqty negizde monıtorıng júrgizedi.
Eske sala keteıik, salynyp jatqan turǵyn úı keshenderindegi páterlerdi satyp alý tártibi turǵyn úı qurylysyna úlestik qatysý týraly sharttar jasasý «Turǵyn úı qurylysyna úlestik qatysý týraly Zańymen (budan ári - Zań) retteledi.
Alaıda, keıbir qurylys kompanııalary Zań talaptaryn aınalyp ótetin mámileler jasaqtaý (aldyn ala satyp alý-satý sharttary, aldyn-ala brondaý kelisimderi jáne t.b.) arqyly jyljymaıtyn múlikti satyp jatyr. Mundaı áreketter úshin Ákimshilik quqyq buzýshylyq týraly Kodekstiń 320-baby boıynsha jaýaptylyq qarastyrylǵan.
«Sońǵy eki jylda oblys prokýratýrasynyń aktileri boıynsha 60 qurylys salýshy ákimshilik jaýaptylyqqa tartylyp, 46 mln teńgeden astam aıyppul óndirildi. Qazirgi ýaqytta Aqtaý qalasynda salynyp jatqan 5 turǵyn úı keshenine («Manhattan» – 41 sh.a., №1/1 ýchaske, «Dostyq» – 20 sh.a., 21 úı, «Premer» – 14 sh.a., 84 úı, «Adal Town» – 29 sh.a., 171 úı, «Aktau Riviera» – Jyly jaǵajaı aımaǵy, 120 ǵımarat) úleskerlerden qarajat tartýǵa ruqsat berildi», delingen oblystyq prokýratýra habarlamasynda.
Bul rette, jańa ǵımarattarda páterlerdi tańdaý kezinde birneshe tarmaqqa nazar aýdarý kerek. Atap aıtqanda, qurylys kompanııasynda kelesi qujattar bolýy kerek:
- Qurylys kompanııasynda jergilikti atqarýshy organdardan alynǵan jerge tıisti quqyq berý týraly sheshim;
- Injenerlik qamtamasyz etý jáne kommýnaldyq qyzmetter kózderine qosylýǵa tehnıkalyq sharttar;
- Salymshylardyń qarajatyn tartýǵa ruqsat(biryńǵaı operatordyń kepildigin alý, ekinshi deńgeıdegi banktiń jobaǵa qatysýy jáne kóppáterli turǵyn úıdiń qańqasy turǵyzylǵannan keıin).
Sonymen qatar jergilikti atqarýshy organnan sáýlet-josparlaý tapsyrmasy alynyp, bas sáýletshimen kelisilgen nobaılyq joba, jumys jobasy saraptamasynyń oń qorytyndysy jáne qurylys-montajdaý jumystarynyń bastalǵany týraly habarlamanyń bolýy mańyzdy.
«Eger bul qujattar usynylmaǵan jaǵdaıda, qurylys obektisi zańsyz, ıaǵnı tıisti ruqsat qujattarmen resimdelmegen bolyp esepteledi», delingen habarlamada.
