Áskerı-patrıottyq tárbıe máselesine mán beredi

Birinshi oqylymda depýtattarǵa bilim berý jáne balanyń quqyqtaryn qorǵaý máseleleri boıynsha Úkimettiń túzetý­leri men áskerı-patrıottyq tár­bıege qatysty Par­lament depýtattary usynǵan zań joba­syn qaraý usynylady. Bul zań jobasynda jetim balalar men ata-anasynyń qamqor­lyǵynsyz qalǵan ba­lalardy balamaly túrde kásibı qabyl­daýshy otbasyna ornalastyrý kóz­deledi. Balalar anyqtalǵan sátten bas­tap mundaı otbasyna balalar úıine jiberilmeı-aq, qamqorshy nemese qorǵanshy organ men qabyldaýshy tárbıeshiler arasyndaǵy kelisimshart negizinde beriledi.

Áskerı-patrıottyq tárbıe másele­leri jónindegi depýtattar bastamashy bolǵan zań jobasy azamattardy áske­rı-patrıottyq tárbıeleýdiń biryń­ǵaı júıesin qurýǵa jáne osy jumysqa barlyq memlekettik organ men uıymdy tartýǵa baǵyttalǵan. Osy maq­satta Qorǵanys mınıstrligi men jer­gilikti atqarýshy organdar jany­nan áskerı-patrıottyq tárbıe jónin­degi úılestirý keńesterin qurý usyny­lady. Buǵan qosa azamattarǵa áskerı jıyn­darǵa shaqyrtýsyz jáne kúndelikti ju­mys­tarynan qol úzbeı-aq, turǵylyqty jerinde áskerı oqý oryndarynda, bilim uıymdary janyndaǵy áskerı kafedralarda (fakýltetterde), sondaı-aq áskerı-tehnıkalyq mektepterde aqyly negizde áskerı daıyndyqtan ótý múmkin­digi beriledi. Oqý jumystan tys ýaqytta jáne óndiristen qol úzbeı júrgiziledi.

Sonymen qatar Májilis Táýelsiz Memleketter Dostastyǵyna qatysýshy memleketterdiń sybaılas jemqorlyqqa qarsy is-qımyldaǵy yntymaqtastyǵy týraly kelisimdi ratıfıkasııalaý týraly zań jobasyn jumysqa alady.