Elimizdiń túkpir-túkpirinen jınalǵan beldi ujymdar men Qyrǵyzstan, Ázerbaıjannan kelgen ártister jeti kún qatarynan janyn sala óner kórsetti. Al olardyń qarym-qabiletin kóziqaraqty kórermenmen birge Álııa Bópejanova, Janysh Qulmambetov (Qyrǵyz Respýblıkasy), Amangeldi Muqan, Anar Erkebaı syndy belgili teatr mamandary baǵalady.
«Túrki dúnıesi men mádenı keńistiginde de Roza Muqanova týyndylarynyń shoqtyǵy bıik. «Máńgilik bala beıne», «Sarra», «Bopaı hanym» dep jalǵasyp kete beretin kórkemdik deńgeıi joǵary qoıylymdardyń barlyǵy da búginde rýhanı qundylyǵymyzdy dáripteıtin ómirsheń týyndylarǵa aınaldy. Osy joly jańa esimderdi ashqymyz keldi, ásirese rejıssýranyń aıaq alysyna baǵa berýdi murat tuttyq. Kórermenge shynaıy teatr atmosferasyn syılaǵan festıvaldyń jemisti de tabysty bir aptasy elimizdiń mádenı keńistiginde erekshe oqıǵaǵa aınaldy dep oılaımyn», dedi joba uıymdastyrýshysy, Mýzykalyq jas kórermen teatrynyń dırektory Ashat Maemırov.
Festıvaldyń ashylý saltanaty aldynda ártister men qatysýshylar qyzyl kilemmen júrip ótti. Al Muhtar Áýezov atyndaǵy Qazaq ulttyq drama teatry ákelgen rejısser Bolat Atabaevtyń jıyrma jyldan beri sahnadan túspeı kele jatqan «Máńgilik bala beıne» spektakli kópshiliktiń qoshemetine bólendi. Jalpy, avtordyń da dramatýrgııaǵa sara joly atalǵan qara shańyraqta teatr kemeńgeri marqum Bolat Atabaevtyń aq batasymen bastalǵan bolatyn.
«Men úshin jazý – minájat. Jazý oıdy buzbaıdy, jandy kirletpeıdi. Jazý jalǵan sóıletpeıdi. Osyndaı qasıet bar qalamda. Otyzǵa da tolmaǵan shaǵymda «Máńgilik bala beıne» degen pesamdy qara shańyraq Muhtar Áýezov atyndaǵy Qazaq drama teatrynyń reformator rejısseri marqum Bolat Atabaev sahnaǵa shyǵardy. Al ol ýaqytta M.Áýezov teatrynda tek qana klassıkter qoıylatyn. Ulylardyń ulaǵaty ári jaýapkershilik bolar, sol sátten bastap ómir boıy jazýǵa adal bolýǵa umtyldym. Sonyń nátıjesinde elimizdiń rejısserleri ǵana emes, baýyrlas qyrǵyz eli men ázerbaıjandyq sýretkerler de shyǵarmashylyǵyma qyzyǵýshylyq tanytyp, mereıtoıyma tamasha qoıylymdaryn alyp kelip qýantty», dedi Roza Muqanova.
Bıylǵy festıvalǵa qonaq retinde qatysqan ákemteatr ujymynan basqa, Astana tórinde alys-jaqynnan kelgen A.Toqpanov atyndaǵy Jambyl oblystyq qazaq drama teatry «Máńgilik bala beıne», Q.Qýanyshbaev atyndaǵy Qazaq ulttyq mýzykalyq drama teatry «Bopaı hanym», Astana qalasy ákimdiginiń Qýyrshaq teatry «Máńgilik bala beıne», S.Seıfýllın atyndaǵy Qaraǵandy oblystyq drama teatry «Eshkim de kináli emes», Túrkistan mýzykalyq drama teatry «Farıza», Qyrǵyz Respýblıkasy Bishkek qalasynan kelgen Jamal Seıdakmatova atyndaǵy «Týngých» jastar teatry «Jesir» jáne ázerbaıjandyq teatr ujymy «Shatyr astyndaǵy Men» qoıylymdaryn teatr synshylary men kórermen sarabyna usyndy. Nátıjesinde, Túrkistan mýzykalyq drama teatrynyń rejısseri Farhad Moldaǵalı qoıǵan «Farıza» dramasy «Úzdik qoıylym» dep tanyldy. «Úzdik rejıssýra» atalymyndaǵy júldeni «Jesir» qoıylymy úshin Jamal Seıdakmatova atyndaǵy «Týngých» jastar teatrynyń rejısseri Arnıs Kydyrmyshev enshilese, «Úzdik akterlik ansambl» atalymyndaǵy marapatty Astana qalasy ákimdiginiń Mýzykalyq jas kórermen teatry Abzalbek Maksım rejıssýrasynda usynylǵan «Qyz jylaǵan» dramasy úshin aldy. «Úzdik er adam beınesi» júldesi – «Shatyr astyndaǵy Men» spektaklindegi Antı Shrek róli úshin Ázerbaıjan Respýblıkasy Gazah memlekettik drama teatrynyń akteri Hazar Gıandjalıǵa, «Úzdik áıel beınesi» atalymyndaǵy syılyq – «Bopaı hanym» tarıhı dramasyndaǵy Bopaı róli úshin Q.Qýanyshbaev atyndaǵy Qazaq ulttyq mýzykalyq drama teatrynyń aktrısasy Leılo Beknazar men C.Seıfýllın atyndaǵy Qaraǵandy oblystyq qazaq drama teatrynyń «Eshkim de kináli emes» spektaklindegi Asyl róli úshin Dına Zaıtovaǵa tabys etildi. Sonymen qatar «Sahnalyq jańa forma tabýdaǵy izdenisteri úshin» «Máńgilik bala beıne» spektaklimen (rejısseri – Á.Ospanbaeva) A.Toqpanov atyndaǵy Jambyl oblystyq qazaq drama teatry marapattaldy. Al «Ekinshi plandaǵy úzdik er adam beınesi» júldesin Astana qalasy ákimdiginiń Qýyrshaq teatry usynǵan «Máńgilik bala beıne» spektaklindegi Depýtat róli úshin Darhan Múslımov, «Ekinshi plandaǵy úzdik áıel beınesi» atalymyn H.Bókeeva atyndaǵy Batys Qazaqstan oblystyq qazaq drama teatrynyń «Qaraly sulý» spektaklindegi Qyzmetshi kempir róli úshin Gúljııan Shyntemir jáne Astana qalasy ákimdigi Qýyrshaq teatrynyń ártisi Aıjan Sadyqova «Máńgilik bala beıne» spektaklindegi Qatıra róli úshin teńdeı bólisti.
«Festıvaldyq qozǵalystar jalpy ónerdiń damýyna, básekelestik pen jańa izdenisterdiń damýyna óte qatty áser etedi. Osylaısha, talaı teatr ártisteri tanylyp, úlken shyǵarmalar dúnıege keledi», dedi Álııa Bópejanova.
Jeti kún boıy kórermenin jarqyn áserge bólegen óner dýmany osylaısha óz máresine jetti. Elimizdiń túkpir-túkpirindegi óner ujymdary men baýyrlas elder teatrlarynyń basyn bas qala tórinde qosqan tamasha teatr dýmanynyń áseri uzaq ýaqyt boıy kórermen jadynda jattalary sózsiz.
