Vıse-premerdiń nazaryna «Shańyraq» bóbekjaıynda ata-analarǵa balalaryn damytý jáne tárbıeleýge kómektesetin «SabiDamu» platformasy usynyldy. Onyń negizgi mindetteri – erte damý skrınıngi jáne ózin-ózi dıagnostıkalaý.
«Biz jańa platforma quryp jatyrmyz. Bul joba balalary qandaı da bir sebeptermen balabaqshalarǵa barmaıtyn ata-analarǵa arnalǵan. Olarǵa balany úıde qalaı damytý kerektigi aıtylady. Ata-analar kez kelgen problemany anyqtaý úshin test tapsyrady. Olardy túzetýge logopedter, defektologter, psıhologter kómektesedi», dedi «О́rleý» kompanııasynyń basshysy Farıda Aqsholaqova.
Platformada qazaq jáne orys tilderinde balany damytýǵa arnalǵan mýltfılmder, túrli tapsyrma bar. Mektepke daıyndyq úderisi onlaın formatta avtomattandyrylady.
Jekemenshik jáne memlekettik mektepke deıingi mekemelerdiń basshylarymen ótken keńeste vaýcherlik qarjylandyrýdy engizý boıynsha qanatqaqty joba tanystyryldy. Onyń basty qaǵıdasy – aqsha balamen qosa erip júredi. Bul ınnovasııalyq júıe qarajatty paıdalanýdyń ashyqtyǵy men tıimdiligin arttyrýǵa, sondaı-aq balabaqshalar arasyndaǵy básekelestikti yntalandyrýǵa baǵyttalǵan. Jobaǵa qatysýshy – Taraz qalasyndaǵy №9 balabaqsha meńgerýshisi Janar Ospanova júıeni engizý tájirıbesi týraly baıandady.
«Vaýcherlik ádisti engizý mektepke deıingi uıymnyń qarjylyq jaǵdaıyna áser etken joq. Kerisinshe, balabaqshaǵa taǵy 100-den astam bala keldi. Bul ádis boıynsha ata-analar balabaqshany ózderi tańdaıdy. Osylaısha, mekemeler arasyndaǵy básekelestik pen jaǵdaıdy jaqsartýǵa degen ynta arta túsedi», dep atap ótti J.Ospanova.
Keńeste Tamara Dúısenova bilim berý júıesindegi sabaqtastyq máselesin kóterip, balalar mektepke ótkende streske ushyramaı, oqý úderisine tez beıimdelýi úshin mektepke deıingi mekemeler men bastaýysh synyptardyń bilim berý baǵdarlamalaryn birizdendirý qajettigin atap ótti. Mańyzdy ról atqaratyn dúnıe — balanyń jeke damý kartasy, ony erte jastan bastap júrgizip, keıin bastaýysh mektepke tapsyrý qajet.
Mektep dırektorlarymen ótken jıynda bilim sapasyn arttyrý máseleleri talqylandy. «Qazaqstan halqyna» qory men bilim berýdi turaqty damytý qory birlesip júzege asyryp jatqan tirek mektepter jobasy óz tıimdiligin kórsetip otyr. Qaraǵandy oblysynda 10 mektep qamtylyp, taǵy bir bilim mekemesin qosý josparlanýda. Jobanyń maqsaty – aýyl balalaryna qaladaǵydaı bilim alýǵa múmkindik jasaý.
Memleket basshysy 2025 jyldy Jumysshy mamandyqtary jyly dep jarııalady. Qaraǵandy tehnıkalyq-qurylys kolledjinde «Besaspap» bıznes-ınkýbatory qanatqaqty jobasy tanystyryldy. Stýdentter óndiristik oqytý sheberlerimen birge halyqqa qyzmettiń 4 túrin – santehnıka, aǵash ustasy, jıhaz jasaý jáne elektr qyzmetterin kórsetedi. Ilkimdi bastama «Jas maman» jobasyn kommersııalandyrýǵa yqpal etedi.
Kolledjde ınklıýzıvti bilim berý máselesine de erekshe mán beriledi. Erekshe qajettilikteri bar stýdentter úshin qolóner ortalyǵy qurylyp, olar munda sheberlikterin shyńdaı alady. Vıse-premer bul baǵyttaǵy jumysty oń baǵalady. Kolledj dırektorlarynyń qatysýymen ótken keńeste eńbek naryǵynda suranysqa ıe jumysshy kadrlardy daıarlaý maqsatynda tehnıkalyq jáne kásiptik bilim berýdi túrlendirý qajettigi talqylandy.
T.Dúısenova oblysta dári-dármekterdi tańbalaý júıesiniń qalaı júzege asyrylyp jatqanyn da tekserdi. Atalǵan júıe dáriniń óndirýshiden tutynýshyǵa deıingi jolyn baqylaýǵa múmkindik beredi, bul kontrafaktili ónimder men jetkizý tizbegindegi quqyq buzýshylyqtardyń aldyn alýǵa kómektesedi.
Vıse-premer Qaraǵandy farmasevtıkalyq keshenin aralap kórdi. Búgingi kúni munda 16 ataýly dárilik zat óndiriledi. Kásiporyn respýblıkadaǵy qanatqaqty jobaǵa qatysqan. Dárilerdiń tańbalanýy munda 2 jyl boıy tájirıbeden ótti. Zańdy óndirýshiler úshin bul úlken artyqshylyq deıdi «Qaraǵandy farmasevtıkalyq kesheni» JShS bas dırektory Sergeı Baron.
T.Dúısenova sondaı-aq iri dárihana qoımalaryn aralap, osy júıeniń qalaı jumys isteıtinin kórdi.
«Memleket basshysy bilim berý men medısınalyq kómek sapasyn arttyrý boıynsha birqatar tapsyrma berdi. Qaraǵandy oblysynda atalǵan baǵytta atqarylyp jatqan jumystardyń nátıjesi jemisti. Biz taǵy qaı baǵyttarda jumys isteý kerektigin talqyladyq. Densaýlyq saqtaý salasynda telemedısınany damytý — mańyzdy baǵyttardyń biri. Bul tek Qaraǵandy oblysynda emes, búkil el boıynsha damıdy», dep atap ótti T.Dúısenova.
