«Biz 2025 jylǵa deıin 800 myń balanyń zamanaýı mektepte oqýyna jaǵdaı jasaımyz. Osylaısha, apatty jaǵdaıdaǵy jáne úsh aýysymmen oqıtyn oqýshylar úshin mektep máselesin tolyǵymen sheshemiz. Bul aýyl jáne qala mektepteriniń aıyrmashylyǵyn edáýir azaıtady. Jalpy, mektep salý Úkimet pen ákimdikter úshin basty mindettiń biri bolýy kerek», degen Prezıdent sózi jadymyzda.
Memleket basshysynyń tapsyrmasyna sáıkes elimizdiń barlyq qıyrynda «Jaıly mektep» ulttyq jobasy aıasynda zamanaýı bilim oshaqtary boı kóterip jatyr. Bul jumys Jambyl oblysynda da talapqa saı qolǵa alynǵan. Máselen, jańa oqý jylynda bir bilim oshaǵy paıdalanýǵa berildi. Jalpy alǵanda, qyrkúıek aıynda óńirde alty mektep paıdalanýǵa berildi.
Birneshe kún buryn oblys ortalyǵy Taraz qalasynda №66 mektep oqýshylarǵa esigin aıqara ashty. Bilim berý nysany «Jaıly mektep» ulttyq jobasy aıasynda boı kótergen bolatyn. Jergilikti atqarýshy bılik ókilderi keltirgen derekke júginsek, sý jańa bilim ordasy 1 200 orynǵa shaqtalǵan. Zamanaýı qural-jabdyqtardyń barlyǵymen qamtamasyz etilgen. Jańa mekteptiń ashylý saltanatyna qatysqan óńir basshysy Erbol Qarashókeev Prezıdent tapsyrmasy negizinde qolǵa alynǵan jumys úzdiksiz jalǵasatynyn tilge tıek etti.
«Memleket basshysy Qasym-Jomart Toqaevtyń tapsyrmasyna sáıkes «Jaıly mektep» ulttyq jobasy aıasynda bilim ordasy esigin aıqara ashty. Jańa oqý jylynda dál osyndaı mektep Baızaq aýdanynyń Sarykemer aýylynda paıdalanýǵa berilgen bolatyn. Bul – joba aıasynda boı kótergen kezekti bilim berý mekemesi. Jalpy, ulttyq joba sheńberinde qolǵa alynǵan jumys aldaǵy ýaqytta da talapqa saı jalǵasady.
Ulttyq joba oqýshy oryndarynyń tapshylyǵy, apattyq jaǵdaıdaǵy mektepterdi joıý jáne úsh aýysymdy oqytý máselesin sheshýge baǵyttalǵany barshaǵa málim. Bizdiń basty maqsatymyz – balalardyń sapaly bilim, sanaly tárbıe alýy úshin zamanaýı, qaýipsiz ári yńǵaıly orta qalyptastyrý. Sol baǵytta jumys atqara beremiz», dedi óńir basshysy mekteptiń ashylý saltanatynda sóılegen sózinde.
Jańa bilim oshaǵy Taraz qalasyndaǵy «Báıterek» shaǵyn aýdanynda ornalasqan. Bilim uıasynda jaılylyq pen qaýipsizdiktiń barlyq talaby saqtalǵan. Munda qajetti beınebaqylaý kameralary men dabyl túımeleri ornatylǵan.
Ǵımaratta 59 oqý kabıneti bar eken. Sonymen qatar ınteraktıvti taqta, zerthanalyq kabınetter, jaıly kitaphana, arnaıy sheberhanalar men kovorkıng ortalyq qarastyrylǵan. Sondaı-aq eki birdeı sport zalmen qamtylǵan. Budan bólek, qosymsha bilim berý qajettiligi bar balalarǵa arnalǵan arnaıy kabınetter de jetkilikti.
«Bizdiń shaǵyn aýdannyń turǵyndary úshin búgingi kún – qýanyshty kún. Biz bul bilim berý nysanyn asyǵa kúttik. Balalarymyzdyń baǵyna oraı ózimiz qonystanǵan úıdiń mańynan sý jańa zamanaýı bilim ordasy ashylǵany kóńil qýantady. Jańa mekteptiń salynýyna kúsh salǵan azamattardyń barlyǵyna aıtar alǵysymyz sheksiz. Ulttyq joba aıasynda zamanaýı bilim uıasynyń boı kóterýine yqpal etken Memleket basshysyna da zor alǵysymyzdy bildiremiz. Endi bizdiń balalarymyz Prezıdent artqan senimniń údesinen shyǵyp, bilimdi azamattardyń qataryn tolyqtyrady dep senemiz. Mundaı qýanysh Taraz qalasynan bólek barlyq aýdanǵa da juǵysty bolsyn», deıdi kópbalaly ana Ǵalııa Qulanbaeva.
Jalpy alǵanda, keıingi ýaqytta Taraz qalasynda jańa bilim ordasyn salý jumystary qarqyndy júrgizilip jatyr. Máselen, jańa oqý jylynda «Araı» jáne «Kazarma» turǵyn alabynyń turǵyndary uzaq jyl boıy aıtyp kelgen mektep máselesi ońynan sheshilip, jańa oqý ordasy paıdalanýǵa berilgen bolatyn. Jergilikti atqarýshy bılik ókilderiniń aıtýynsha, oblys ortalyǵyndaǵy balalardyń sapaly bilim alýy úshin aldaǵy ýaqytta da qyrýar jumys atqarylmaq.
Taraz
