M.Áshimbaev óz sózinde Abaı atyndaǵy daryndy balalarǵa arnalǵan respýblıkalyq mamandandyrylǵan mektep-ınternatynyń jańa ǵımaratyn salý ulttyq bilim berý júıesin jetildirý jolyndaǵy mańyzdy qadam ekenin atap ótti. Sondaı-aq ol Memleket basshysy elimizde bilim sapasyn arttyrýǵa jáne pedagog mártebesin nyǵaıtýǵa únemi basa mán berip kele jatqanyn tilge tıek etti.
«Qazirgi tańda elimizde oqýshylardyń jan-jaqty damýyna qajetti jaǵdaı jasaý jáne olardyń sapaly bilim alýyn qamtamasyz etý úshin júıeli jumys júrgizilip keledi. Bul rette Prezıdentimiz Qasym-Jomart Toqaevtyń bastamasymen iske asyrylyp jatqan «Jaıly mektep» ulttyq jobasyn erekshe atap ótken jón. Aýqymdy joba qalalarmen birge shalǵaıdaǵy aýyldardy da qamtıdy», dedi M.Áshimbaev.
Sonymen qatar Senat spıkeri Abaı atyndaǵy mekteptiń jańa ǵımaratyn salý orta bilimniń ulttyq brendin qalyptastyrýǵa qosylǵan úlken úles ekenin aıtty. Sondaı-aq palata tóraǵasy bul qadam qoǵamda ulttyq múddeni berik ornyqtyrý jáne tarıhı sabaqtastyqty saqtaý úshin qajet ekenine nazar aýdardy.
«Abaı mektep-ınternatyn jańǵyrtý otandyq bilim berýdi odan ári damytýǵa jáne óskeleń urpaqqa rýhanı-adamgershilik qundylyqtardy dáripteýge tyń serpin beredi. Jobanyń basty maqsaty – uly Abaıdyń «Tolyq adam» tujyrymdamasyna taban tireı otyryp, ultqa qyzmet etetin patrıot azamattardyń jańa býynyn tárbıeleý. Osy baǵyttaǵy jumysty táýelsiz Qazaqstannyń qundylyqtarymen jáne ozyq halyqaralyq tájirıbemen úılestire otyryp júrgizý Memleket basshysy usynǵan «Adal azamat» tujyrymdamasyn iske asyrýǵa jol ashady», dep M.Áshimbaev atalǵan jobany júzege asyrýǵa qoldaý kórsetken Almaty qalasynyń ákimdigine, Oqý-aǵartý mınıstrligine jáne osy ıgi iske ún qosqan barsha belsendi azamatqa alǵys bildirdi.
Sondaı-aq sapar barysynda senatorlar Sanjar Asfendııarov atyndaǵy Qazaq ulttyq medısına ýnıversıtetiniń basshylyǵymen, oqytýshylarymen, stýdentterimen kezdesip, joǵary oqý ornynda oqıtyn bolashaq dárigerler turyp jatqan jańa jataqhanalardyń jaǵdaıymen tanysty.
Medısınalyq ýnıversıtettiń rektorymen kezdesý kezinde Memleket basshysy belgilep bergen elimizdiń ǵylymı-tehnologııalyq saıasatynyń basym baǵyttaryn iske asyrý mindetteri talqylandy. Klınıkalyq zertteýlerdiń perspektıvalary, ǵylymı kadrlar daıarlaý jáne olardyń biliktiligin arttyrý, zertteý jobalaryna áleýmettik jáne qarjylyq qoldaý kórsetý, ınnovasııalyq ádistemeler men tehnologııalardy engizý máselelerine de mán berilip, tyń usynystar aıtyldy.
Buǵan qosa Senat tóraǵasy Almatydaǵy №63 jalpy bilim beretin mektep bazasynda ornalasqan resýrstyq ortalyqtyń qyzmetimen tanysty. Bul jerde ınklıýzıvti bilim berý baǵytyndaǵy ınnovasııalyq tásilder belsendi qoldanylyp keledi. Atap aıtqanda, Parlament depýtattary oqytýdyń ártúrli ádisteri, erekshe qajettilikteri bar balalardy oqytýǵa arnalǵan mamandandyrylǵan zaldar, logoped, psıholog, ınklıýzııa, oıyn, sensorlyq jáne basqa da salalyq kabınetterdiń jumysyna nazar aýdardy.
