Ákimniń aıtýynsha, Mańǵystaý aýdanynyń ortalyǵynda tutas bir shaǵyn aýdan boı kóterip keledi. Atalǵan aýdanda 800 jer orynǵa ınfraqurylym tolyq júrgizildi. Jańa aýdanda bıyl «Jaıly mektep» jobasy aıasynda 600 oryndyq mektep pen dárigerlik ambýlatorııa ǵımaraty salynyp jatyr. Odan bólek, munda salýǵa josparlanǵan 600 oryndyq mádenıet úıi, sport kesheni, polısııa, prokýratýra, sot, muraǵat, qorǵanys isteri, oqýshylar saraıy, ákimdik ǵımarattary qurylystarynyń jobalyq-smetalyq qujattamalary daıyndalý ústinde.
Memleket basshysynyń tapsyrmasyna sáıkes aýdanda jańa bilim nysandarynyń qurylysy qarqyndy júrgizilip jatyr. Bıyl Beki aýylynda alǵash ret 100 oryndyq mektep ashyldy.
Mádenıet, sport salasynda da birqatar oń ózgeris boldy. Aýyl ónerpazdaryn gastroldik saparlarǵa tasymaldaýǵa qolaıly, syıymdylyǵy 13 adamdyq jańa avtokólik paıdalanýǵa berildi. Sondaı-aq aýdannyń 12 aýylynda ashyq sport, balalardyń oıyn, vorkaýt alańdaryn salý jumystary júrip jatyr.
Mańǵystaý aýdanynyń negizgi áleýmettik-ekonomıkalyq salasy – aýyl sharýashylyǵy. Qazir aýdanda 578 sharýa qojalyǵy men 531 mal sharýashylyǵy tirkelgen. Atalǵan aýdan oblys kólemindegi túıe basynyń 40%-yn qamtıdy, bul jylyna shamamen 20 myń tonna túıe sútin óndirýge múmkindik beredi. «Aýyl amanaty» jobasy aıasynda túıe sútin óndirýdi ulǵaıtý maqsatynda 10 joba usynylǵan. Sonymen qatar aýdanda 3 ınvestısııalyq joba qolǵa alynǵan. Joba quny 864 mln teńgeni quraıtyn «Karat» JShS bastamasymen aýyzsý shyǵarý sehynyń qurylysy júrgizilip jatyr. Seh qurylysy aıaqtalǵannan keıin 35 adam turaqty jumys ornymen qamtylady. Al 2025 jyly «Caspiy Milk» JShS men «Mangystau Milk» JShS túıe sútinen untaqtalǵan sút ónimin óndirý oryndaryn iske qospaq.
Kezdesýde oblys ákimi Nurdáýlet Qılybaı atalǵan aýdanǵa qarasty Ondy aýylyn respýblıka deńgeıinde eń úlgili aýylǵa aınaldyrýdy usyndy.
«Halyq jazýshysy Ábish Kekilbaev týǵan Ondy aýylynda keıingi jyldary birde-bir quqyq buzýshylyq tirkelmegen. Aýylda araq-sharap satylmaıdy. Munda bir myń túp jemis aǵashy egilgen baq bar. Sondyqtan Ondyny Aqmola oblysyndaǵy Rodına aýyly sııaqty úlgili aýyl qataryna qosýdy kózdep otyrmyz. Búginde aýyldy kórkeıtý maqsatynda arnaıy jospar jasalyp jatyr», dedi Nurdáýlet Qılybaı.
Kezdesý barysynda jergilikti turǵyndar mektep tapshylyǵy, atshabar alańynyń salynýy, qoǵamdyq kólik qajettiligi, karerler men Qosbulaq aýylynyń máseleleri týraly suraqtar qoıdy. Sondaı-aq mal sharýashylyǵy, densaýlyq saqtaý, bilim, sport salalaryn damytý jóninde de usynystar aıtyldy. Bes saǵatqa sozylǵan kezdesýde aıtylǵan ótinishter men qoıylǵan suraqtarǵa jaýap bergen oblys ákimi jaýapty sala basshylaryna túıtkildi máselelerdi naqtyly sheshýdi tapsyrdy.
Kezdesýden keıin oblys ákimi jeke máselelerimen tirkelgen aýdan azamattaryn qabyldady.
Mańǵystaý aýdany – jarqyn, júıeli jumystardy jaqsy jolǵa qoıǵan, máselelerdi tııanaqty sheship, tyńǵylyqty is atqaryp kele jatqan, ozyq isimen úlgi aýdan. Aýdanda atqarylǵan nátıjeli ister men josparlanǵan sharýalar az emes, olardyń birqatary joǵaryda aıtyldy. Bul – bar qajyr-qaıratyn, bilim-biligin el ıgiligine arnaǵan janashyr jandardyń tabandy jumysynyń jemisi.
Mańǵystaý oblysy
