Esterińizge sala ketsek, keshendi testileýdi tapsyrýǵa ótinish qabyldaý 28 qazan men 10 qarasha aralyǵynda QR ǴJBM Ulttyq testileý ortalyǵynyń saıtynda app.testcenter.kz júzege asyrylady.
Ǵylym jáne joǵary bilim mınıstrliginiń málimetinshe, magıstratýraǵa túsýge arnalǵan keshendi testileýge 11 myńǵa jýyq ótinish qabyldandy.
Eń kóp tańdalǵan bilim berý baǵyttary qatarynda «Pedagogıkalyq ǵylymdar», «Injenerlik, óńdeý jáne qurylys salalary» jáne «Bıznes, basqarý jáne quqyq» bar. Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test.
Barlyǵyna 3 saǵat 55 mınýt beriledi. Shekti ball – 75 ball.
Esterińizge sala ketsek, bıyl beıindi magıstratýraǵa túsý formatyna ózgerister engizildi. Beıindi magıstratýraǵa túsýge nıetti úmitkerler «Oqýǵa daıyndyǵyn anyqtaýǵa arnalǵan test» bóliminen bosatyldy. Osylaısha, olar tek bilim berý baǵdarlamalary tobynyń beıini boıynsha test tapsyrady. Shekti ball keminde 30 ball, onyń ishinde árbir beıindi pán boıynsha keminde 7 ball.
«Testilenýshi apellıasııaǵa tehnıkalyq sebepter boıynsha testileý barysynda, testileý tapsyrmalarynyń mazmuny boıynsha testileý aıaqtalǵannan keıin 30 mınýt ishinde ótinish bere alady. Apellıasııa bes kún ishinde qarastyrylady. Odan soń sertıfıkat oqýǵa túsýshiniń Jeke kabınetinde qoljetimdi bolady. Magıstratýrada oqý úshin qysqy qabyldaýǵa 4 myńnan astam grant bólingen», delingen mınıstrlik habarlamasynda.
