Sýret: Májilistiń baspasóz qyzmeti
Otyrysty ashqan Serik Egizbaev ótken aptada aýyl sharýashylyǵy qyzmetkerleriniń birinshi forýmynda Prezıdent Qasym-Jomart Toqaev qazirgi jahandyq jáne ishki syn-qaterler turǵysynan salany damytý jáne onyń básekege qabilettiligin arttyrý boıynsha aýqymdy mindetter qoıǵanyn eske saldy. Sondaı-aq depýtat agroónerkásip kesheniniń máseleleri fermerlermen turaqty túrde komıtet otyrysynda talqylanyp, 13 qarashada ótken jalpy otyrysta Úkimetke tıisti depýtattyq saýal joldanǵanyn aıtty. Onda shuǵyl sheshimdi qajet etetin birqatar másele qamtylǵan.
Aýyl sharýashylyǵy mınıstri Aıdarbek Saparov óz sózin taqyryp aıasyndaǵy saýaldarǵa jaýap berýden bastady. Ol ótken jumadaǵy aýyl sharýashylyǵy qyzmetkerleri forýmynda Memleket basshysy «Azyq-túlik kelisimshart korporasııasy» arqyly naryqtaǵy baǵany turaqtandyrý úshin fermerlerden astyq satyp alýdy uıymdastyrýdy tapsyrǵanyn aıtty.
– Osy tapsyrmany oryndaý maqsatymen búgin Azyq-túlik korporasııasy satyp alý baǵasyn jarııalaıdy. Úkimet rezervinen 10 mlrd teńge bólinip, alǵashqy 155 myń tonna astyqty satyp alý josparlanyp otyr. Sonymen qatar korporasııa astyq baǵasynyń kúrt tómendeýine jol bermeý úshin fermerlerdi iri kelisimsharttar jasaýǵa jumyldyryp jatyr. Qazirgi tańda konsolıdasııa nátıjesinde 20 mln dollarǵa bes eksporttyq kelisimshart jasaldy, – dedi mınıstr.
Kóktemgi egis jáne egin jınaý jumystaryna berilgen nesıeniń merzimin uzartý máselesine qatysty mınıstr búgingi tańda sharýalardan 5,1 mlrd teńgeden asa nesıege 119 ótinish kelip túskenin aıtty. Bul rette ár jaǵdaı jeke-jeke qaralady, jappaı uzartý qarastyrylmaǵan.
Sonymen qatar A.Saparov sýbsıdııalar boıynsha qaryzdardy óteý belgilengen kestege sáıkes júrgiziletinin atap ótti. Ákimdikterdiń deregine súıensek, qosymsha sýbsıdııa qajettiligi 256 mlrd teńgeni quraıdy. Alaıda «kútý tiziminde» jalpy somasy 194 mlrd teńge bolatyn maquldanǵan ótinim tur. Onyń ishinde 56 mlrd teńgesi – ósimdik sharýashylyǵyna, 20 mlrd teńgesi – mal sharýashylyǵyna, 118 mlrd teńgesi qarjy quraldaryna baǵyttalǵan.
– Sýbsıdııa – óte mańyzdy ári aýqymdy másele. Sýbsıdııalar zamanaýı tehnologııalardy, tyńaıtqyshtardy, gerbısıdterdi qoldanatyn, tehnıka satyp alatyn aldyńǵy qatarly sharýashylyqtarǵa berilýi kerek. Biraq jyldar boıy mundaı sharýashylyqtar sýbsıdııa ala almasa, taýy shaǵylady. Sondyqtan osy máseleni sheship, sýbsıdııa boıynsha qaryzdy tolyq óteý mańyzdy dep esepteımin, – dedi Májilis depýtaty Erkebulan Mámbetov.
Depýtattar óz tarapynan basqa da usynystar aıtyp, jaýapty memlekettik organdarǵa naqty suraqtar qoıdy. Atap aıtqanda, astyqty saqtaýdy sıfrlandyrý, tasymaldaý shyǵyndaryn sýbsıdııalaý, aımaqtyq logıstıkalyq habtar qurý, qant qyzylshasyn ótkizý, kúnbaǵysty eksporttaý jáne basqa da máseleler kóterildi.
Jıyn sońynda Serik Egizbaev keńeıtilgen otyrysta fermerlerden kelip túsken máseleler boıynsha usynymdar Úkimetke jetkiziletinin atap ótti.
– Úkimet otyrysynyń qorytyndysyn kútemiz. Búgingi talqylaýdyń negizgi taqyryby astyq bolǵanymen, depýtattar kótergen barlyq másele – qant qyzylshasy, kúnbaǵys, kúrishke qatysty suraqtar Úkimettiń sheshiminde eskerilse eken deımiz, – dep túıindedi komıtet tóraǵasy.
