Qazaqstannyń densaýlyq saqtaý júıesin jańǵyrtý úshin basshylardyń kóshbasshylyq qasıetteri, kadrlardy daıarlaý sapasy, ınfraqurylymdy jańartý jáne jeke sektordyń róli mańyzdy. Osyǵan oraı Qazaqstandyq densaýlyq saqtaý salasy menedjerleriniń qaýymdastyǵy jyl saıyn sala mamandaryna kóshbasylyq daǵdylaryn arttyrýǵa, tájirıbe almasýǵa múmkindik beretin alań usynady. Almaty menedjment ýnıversıtetinde ótken forýmǵa jetekshi sarapshylar, medısınalyq mekemelerdiń basshylary men kásibı qaýymdastyq ókilderi qatysty. Is-shara barysynda elimizdiń densaýlyq saqtaý ınfraqurylymynyń qazirgi jaǵdaıy, kadrlyq qamtamasyz etý máseleleri jáne medısınalyq qyzmetterdiń sapasyn arttyrý joldary keńinen talqylandy.
Qazaqstandyq densaýlyq saqtaý salasy menedjerleriniń qaýymdastyǵy keńesiniń tóraǵasy, qaýymdastyqtyń teń quryltaıshysy, DrPH Qýanysh Erǵalıev naǵyz kóshbasshy joǵary moraldyq-etıkalyq qasıetterge ıe bolýy kerek, ózgeristerdi aldyn-ala bilip, jedel túrde ınnovasııalyq sheshimderdi taba bilýi kerek ekenin atap ótti.
«Bizdiń mıssııamyz – Qazaqstannyń densaýlyq saqtaý basshylary úshin kóshbasshylyq pen ınnovasııa kózi bolý. Búginde biz jahandyq epıdemııalardan bastap klımattyq ózgerister men áleýmettik turaqsyzdyqqa deıingi kóptegen qıyndyqqa toly álemde ómir súrip jatyrmyz. Bul jaǵdaıda turaqty damý maqsattaryn nazardan tys qaldyrmaý óte mańyzdy. Olar densaýlyq saqtaýdy jaqsartý, medısınalyq qyzmetterdiń qoljetimdiligi men sapasyn arttyrý jáne qoǵamnyń barlyq salasynyń qajettilikterin qanaǵattandyratyn turaqty júıeni qurý úshin uzaq merzimdi josparlar qurýǵa kómektesedi. Densaýlyq saqtaý ózgeriske daıyn jáne syrtqy faktorlarǵa tózimdi bolýy tıis jáne Qazaqstanda turaqty damý maqsattaryn iske asyrý bizden joǵary dárejedegi kásibılik pen jaýapkershilikti talap etedi. Búgingi forým dál osy qasıetterdi damytýǵa arnalǵan. Sondaı-aq ár qatysýshynyń kásibı damýyn qoldaýǵa, jańa ıdeıalar oılap tabýǵa shabyttandyrýǵa jáne olardy sátti júzege asyrý úshin tıimdi ádisterdi usynýǵa baǵyttalǵan», dedi Nazarbaev Ýnıversıteti Medısına mektebiniń assıstent professory Qýanysh Asylhanuly.
Forým barysynda Qazaqstandaǵy DDSU-nyń Eldik keńse basshysy, Harvard University (AQSh), King's College London (Ulybrıtanııa) sııaqty bedeldi oqý oryndarynyń jáne zertteý mekemeleriniń álemdik deńgeıdegi jetekshi mamandary, sondaı-aq Germanııadan kelgen sarapshylar baıandama jasap, tájirıbelerimen bólisti. Spıkerler densaýlyq saqtaý salasyn jaqsartýǵa jáne jahandyq kontekste Densaýlyq saqtaý júıesin turaqty damytýǵa yqpal etetin halyqaralyq tásilderdi usyndy.
King's Business School, King's College of London (Ulybrıtanııa) Strategııalyq adamı kapıtal boıynsha PhD professor Dana Mınbaevanyń aıtýynsha, bas dırektorlar urpaqtardyń bir-birinen aıyrmashylyǵyn, saıası kózqarastardy, jahandyq problemalardy jáne t.b. eskere otyryp, úlken aýdıtorııamen tildese bilýi kerek.
«Kóshbasshylar óz uıymynda ortaq kózqaras qalyptastyrý úshin strategııalyq kommýnıkasııany ǵana emes, sonymen qatar storıtellıngti de meńgerýi kerek. Densaýlyq saqtaý salasynyń bolashaǵyn anyqtaýǵa, álemdik jáne jergilikti kontekstterdegi ózgeristerden habardar bolýǵa, makrotendensııalardy ajyratyp, basqalar qıyndyq pen kedergi dep sanaıtyn jerden múmkindikterdi kórýge tyrysyńyz. Áleýmettik jáne iskerlik qundylyqtardy qalyptastyrý múmkindikteri men artyqshylyqtaryn zertteńiz, uıymnyń qundylyqtary men maqsattaryna, qoǵamdyq mindetterge adal bolyp, ósýdiń múmkindikterin paıdalanyńyz. Múddeli taraptardyń ishki jáne syrtqy jelilerine strategııalyq áser etý daǵdylaryn damytyńyz, seriktestik pen ekojúıe úlgilerin qalyptastyryńyz, adamdardy qatysýǵa yntalandyryńyz, negizgi nátıjelerge qol jetkizý úshin olardyń daǵdylaryn paıdalanyńyz», dep keńes berdi ol.
Forým barysynda jekemenshik klınıka basshysy, hırýrg Oljas Shýlenbaev elimizdegi kadr tapshylyǵy máselesine toqtaldy.
«Densaýlyq saqtaý salasynda 270 563 medısına qyzmetkeri jumys isteıdi, onyń ishinde 79 261-i dárigerler. Degenmen, bul san aýyldyq jerlerdegi qajettilikterdi óteı almaıdy. Jas mamandardyń úlken klınıkalarda jumys isteýge umtylýy aýyldaǵy medısına sapasynyń tómendeýine ákeledi. Kóptegen jas dárigerler jumysyn úlken qalalarda bastaǵysy keledi, biraq tájirıbe jınaqtaýǵa kishkentaı mekemelerden bastaý mańyzdy. Men mansabymdy aýdandyq aýrýhanadan bastadym, bul meni shyńdady» deıdi Shýlenbaev.
Sonymen qatar jıynda jeke sektor men memlekettiń birlesken jobalardy júzege asyrý múmkindigi talqylandy. Jeke ınvestısııalar arqyly aýyldyq jerlerdegi densaýlyq saqtaý deńgeıin kóterý máselesi kóterildi.
Is-shara sońynda utys oıyny oınatylyp, qatysýshylar Qazaqstannyń jetekshi bıznes-mektepterinen Densaýlyq saqtaý salasyndaǵy MBA magıstratýrasynda oqýǵa granttar utyp aldy.
Sondaı-aq densaýlyq saqtaý salasy menedjerlerine arnalǵan strategııalyq josparlaý, medısınalyq qyzmetterdi satý, akkredıtteý standarttary, medıasııa jáne pasıenttermen tıimdi qarym-qatynas sııaqty ózekti taqyryptar boıynsha master-klasstar ótkizildi. Dásúrli forým qatysýshylarǵa bilim men tájirıbe almasýǵa, sondaı-aq Qazaqstanda medısınany damytýdyń bolashaq baǵyttaryn talqylaýǵa arnalǵan biregeı platformaǵa aınaldy.
