Oıdyń ıirimin boıaý tilinde sóıletý arqyly óziniń qoltańbasyn qalyptastyrǵan Jeńis Kákenuly jaqynda Amerıkanyń Nıý-Iork qalasynda ótken halyqaralyq konkýrsta «Qala peızajy» atalymy boıynsha «Altyn qyran» atty bas júldeni jeńip alyp, Qazaq eliniń taǵy bir mártebesin ósirdi. Onyń abyroıyn asyrǵan Arqa tósindegi Esil ózeniniń eki jaǵynda boı kótergen kórikti Astanamyzdyń kóz tartatyn ásem ǵımarattaryn alýan túrli aıshyqty boıaýlarmen ajaryn ashqandyǵynda jatqany anyq.
Halyqaralyq deńgeıde ótken bul óner saıysyna álemniń AQSh, Kanada, Ulybrıtanııa, Fransııa, Germanııa, Reseı, Qytaı, Japonııa, Izraıl, О́zbekstan, Qyrǵyzstan, ózge de memleketterdiń 1500 sýretshisiniń arasynan top jaryp shyǵý ekiniń birine buıyra bermeıtin baq ekeni belgili. Osy turǵydan kelgende Jeńistiń bul jeńisi onyń talantyn tanytyp qana qoımaı, qarym-qabiletiniń de myqty ekenin dáıektese kerek.
Ol buǵan deıin de talaı óner jarysynda ózin tanyta bilgen. Keıbir týyndylary ózge memleketterdiń muraǵattaryna qabyldanyp, oryn alǵan.
Eseli eńbegin, shyǵarmashylyq jumysyn tanytý úshin talantty sýretshi otandyq jáne dúnıejúzilik deńgeıde elýge jýyq kórmesin, áldeneshe ret shyǵarmashylyq keshterin ótkizip, jurttyń iltıpatyna bólengenin de aıta ketsek deımiz. Ol tek sýretshi ǵana emes, ushqyr oıdyń qarymymen býyrqanǵan boıaýlardy kórkem tilde sóıletip júr. О́nerli azamattyń qalamynan týǵan «Aq zer» atty kitabynan alar taǵylym, úırener úlgi az emes. Qazaq jurtynyń mereıin asyrǵan Jeńistiń jeńisi táýelsiz jurtymyzdyń taǵy bir eleýli sáti deýimizge bolady.
Súleımen MÁMET,
«Egemen Qazaqstan».
