Sýret: kaztbu.edu.kz
Oblystyq densaýlyq saqtaý basqarmasy basshysynyń orynbasary Almagúl Ábilovanyń málimetinshe, medısına salasyn tańdaǵan túlekterge qoldaý jasalyp otyr. Keıingi 7 jylda adam densaýlyǵyna arashashy bolýdy maqsat etken jas órenderge 616 grant bólingen. Al 2018 jyldan rezıdentýra baǵdarlamasymen bilim alǵysy kelgen mamandarǵa grant qarastyrylypty.
«Atyraý qalasyndaǵy emdeý mekemelerinde jumys isteýge nıetti mamandarǵa 5 mln teńge, aýdan ortalyǵyna barǵan dárigerlerge 8,5 mln teńge bir rettik járdemaqy beriledi. Al shalǵaıda ornalasqan eldi mekenderde jumys isteıtin dárigerlerge beriletin járdemaqynyń mólsheri 10 mln teńgege jetti», deıdi A.Ábilova.
Bıyl dáriger bolýdy qalaǵan 113 jasqa oblys ákiminiń granty berilgen. Qazir 82 túlek medısına ýnıversıtetteriniń bakalavrıatynda, al 31 jas rezıdentýrada oqyp júr. Oblys ákiminiń grantymen rezıdentýrany bitirgen jas mamannyń biri – Qýanysh Qubaıdollauly. Ol oblystyq kardıologııa ortalyǵyna jumysqa ornalasqan.
«Mamandyq tańdar kezde medısına salasyna ańsarym aýdy. Sóıtip, 2021 jyly oblys ákiminiń grantyna ıe bolǵan edim. Bilimimdi Aqtóbe qalasyndaǵy M.Ospanov atyndaǵy Batys Qazaqstan medısına ýnıversıtetinde reanımatolog mamandyǵy boıynsha rezıdentýrada jalǵastyrdym. Qazir oblystyq kardıologııa ortalyǵynda dáriger- anestezıolog-reanımatolog bolyp jumys isteımin. Jergilikti atqarýshy organ tarapynan jastardyń joǵary bilim alýyna osyndaı qoldaý kóbirek kórsetilse, kadr tapshylyǵy máselesi sheshimin tabady», deıdi Qýanysh Qubaıdollauly.
Dárigerdiń aıtýyna qaraǵanda, kardıologııa ortalyǵynda júrekke kúrdeli operasııalar jasala bastaǵan. Ortalyq dárigerleri kún saıyn 3-4 operasııa jasaıdy.
Basqarma basshysy Qaısar Abdalıevtiń aıtýynsha, keıingi eki jyldan beri munaıly óńir tarapynan medısına salasynyń qyzmetkerlerin baspanamen qamtýǵa nazar aýdarylyp keledi. Osy maqsatta arnaıy óńirlik baǵdarlama iske qosyldy. Baǵdarlamaǵa sáıkes dárigerlerdiń bastapqy jarna tólemeı, jyldyq mólsherlemesi 5 paıyzben nesıe alýyna bolady. Bul baǵdarlamaǵa «Otbasy bank» AQ qoldaý bildirdi. Mundaı tómen paıyzben 25 mıllıon teńgege deıin nesıe 19 jylǵa beriledi.
«Atalǵan baǵdarlama medısınalyq mekemelerde jumys isteıtin áriptesterimniń qyzyǵýshylyǵyn týdyrdy. Keıingi eki jylda 100-ge jýyq dáriger osy turǵyn úı baǵdarlamasy arqyly baspana alýǵa ótinish bildirdi. Arnaıy komıssııa baǵdarlama talaptaryna sáıkes ótinish ıelerin baldyq júıe arqyly baǵalap, qorytyndy shyǵardy. Osylaısha, bul baǵdarlama 42 bilikti dárigerlerdiń turǵyn úı máselesin sheshýge múmkindik berdi», deıdi Q.Abdalıev.
Atyraý oblysy
