Oblystyq PD málimetinshe, oqıǵa Aqtóbe qalasynda bolǵan. Qala turǵyny burynǵy áıeli men balalaryna alkogoldik masań kúıde kelip janjal shyǵaryp, kóshede kámeletke tolmaǵan uldaryna tıisip, qol jumsaǵan. Balalaryn bul jerden dereý alyp ketýge tyrysqan anasyn qýyp jetip, qasaqana nıetpen áıelge birneshe soqqylar jasaǵan.
«Bul derek boıynsha Aqtóbe qalasynyń polısııa bólimi Qylmystyq kodekstiń 109-1-babymen dereý qylmystyq is qozǵap, kúdiktini ýaqytsha ustaý ızolıatoryna qamady. Tıisti saraptamalar taǵaıyndalyp, jan-jaqty tergeý amaldary júrgizilip jatyr», delingen málimette.
2024 jylǵy 21 qarashada osy is boıynsha sot úkimi shyqty. Eki nemese odan da kóp adamdy jáne kórineý kámeletke tolmaǵandardy uryp-soǵý túrindegi qylmystyq teris qylyqty jasaǵany úshin sot úkimi boıynsha er adam 45 táýlikke qamaqqa alý jazasyna kesildi. Sonymen qatar, sottalýshyǵa erekshe talaptar belgilenip, ol alkogol jáne esirtki ónimderin qoldanbaý, sondaı-aq ishki ister organdaryna aıyna úsh ret kelýge mindetteldi.
Buǵan qosa, sottalýshynyń bir jyl merzimge jábirlenýshimen kez kelgen baılanysyna tyıym salyndy. Sot úkimi zańdy kúshine áli engen joq.
