Foto: Mádenıet jáne aqparat mınıstrligi
Memleket basshysynyń quttyqtaýyn Mádenıet jáne aqparat mınıstri Aıda Balaeva oqyp berdi.
«Bul – tól mádenıetimizdi kúlli álemge tanytatyn biregeı joba. Bıylǵy baıqaý qazaq kınosynyń korıfeıi Sháken Aımanovtyń týǵanyna 110 jyl jáne «Qazaqfılm» kınostýdııasynyń qurylǵanyna 90 jyl tolýymen tuspa-tus kelip otyr. Munyń sımvoldyq máni zor. Kıno óneri jurtshylyqty jasampazdyq pen jańashyldyqqa shaqyrady, jalpy adamzatqa ortaq qundylyqtardy dáriptep, ult sapasyn jaqsartýǵa yqpal etedi. Sondaı-aq túrli halyqtyń mádenı baılanysyn nyǵaıtady», delingen quttyqtaý hatta.
Memleket basshysy elimizde ulttyq kınematografııany qoldaýǵa basa mán berilip otyrǵanyn da atap ótti.
«Osy salany damytý úshin Qazaqstanda aýqymdy jumys atqarylyp jatyr. Mamandarymyz mazmundy ári maǵynaly kartınalar túsirip, aǵa býynnyń sara jolyn laıyqty jalǵastyryp keledi. Fılmderimiz bedeldi baıqaýlarda júlde alyp júr. «Eýrazııa» halyqaralyq kınofestıvali shyn júırikterdi anyqtap, eń úzdik jobalarǵa jol ashady dep senemin. Kórermenge oı salyp, rýhanı azyq bolatyn týyndylaryńyz kóp bolsyn!», dedi Prezıdent.
О́z kezeginde Aıda Balaeva «Eýrazııa» kınofestıvaliniń Qazaqstan men búkil Ortalyq Azııanyń mádenı brendine aınalǵan biregeı forým ekenin jetkizip, otandyq kıno salasyn júıeli túrde damytý, zańnamalyq bazany odan ári jetildirý boıynsha jumystar jalǵasatynyn aıtty.
Aıta keteıik, halyqaralyq «Eýrazııa» kınofestıvali 24-30 qarasha aralyǵynda ótedi. Festıvalge 15-ten astam el qatysyp jatyr. Konkýrs baǵdarlamasynda úsh qurlyqtan kelgen 12 fılm usynylady.
