Foto: ashyq derekkóz
Ulttyq komandamyzdyń bas bapkeri Qaırat Sátjanov sary qurlyqtyń basty dodasyna úzdik shákirtteriniń barlyǵyn qosýdy qup kórgen eken. Quramanyń bas bapkeri boksshylardyń daıyndyǵyna kóńili tolatynyn aıtty.
«Qurama jigitteriniń daıyndyǵy jaqsy. Kýba, Reseı boksshylarymen birlesken oqý-jattyǵýdyń ótkizýdegi áý bastaǵy josparymyz boksshylarymyz Azııa chempıonatyna 100 paıyz daıyn bolyp barý edi. Jospar oryndaldy. Endi tek nátıje kórsetýimiz kerek», dedi ol.
Esterińizge sala keteıik, Taı elinde Sanjar Táshkenbaı (48 kg), Sáken Bıbosynov (51 kg), Mahmýd Sabyrhan (54 kg), Orazbek Asylqulov (57 kg), Beıbarys Jeksen (60 kg), Muhamedsabyr Bazarbaıuly (63,5 kg), Dýlat Bekbaýov (67 kg), Abylaıhan Júsipov (71 kg), Dıas Moljigitov (75 kg), Erasyl Jaqpekov (80 kg), Bekzat Nurdáýletov (86 kg), Saǵyndyq Toǵambaı (92 kg), Aıbek Oralbaı (+92 kg) syndy sańlaqtar kúsh synasady.
Al áıelder quramasynyń bapkerlik keńesi Azııa chempıonatyna tómendegi myna boksshylardy bekitti: Áıgerim Sáttibaeva (48 kg), Alýa Balqybekova (50 kg), Jazıra Oraqbaeva (52 kg), Symbat Álıasqar (54 kg), Uljan Sársenbek (57 kg), Vıktorııa Grafeeva (60 kg), Aıda Ábikeeva (63 kg), Mılana Safronova (66 kg), Natalıa Bogdanova (70 kg), Dıana Maǵaýııaeva (75 kg), Gúlsaıa Erjan (81 kg), Eldana Talıpova (+81 kg).
