Alǵashqy altyndy erkin kúres sheberi Meıirjan Áshirov qorjynǵa saldy. 70 kg salmaq dárejesinde beldesken ol Reseı, Mońǵolııa, Iran, Úndistannyń ókilderinen basym tústi. Bir aıta keterligi, fınalda Meıirjan 0:2 utylyp jatqanyna qaramastan, sońǵy sátte jeńisti qarsylasynyń ýysynan julyp áketti. Sóıtip, M.Áshirov óziniń segiz jyl burynǵy kórsetkishin qaıtalap, sporttyq mansabynda ekinshi ret dál osyndaı ataqqa ıe boldy.
97 kg salmaqta aıqasqan Kamıl Kýrýglıevke de altyn tuǵyrǵa kóterilý ońaıǵa soqpady. Bastapqy báskelerdiń barlyǵynda qarsylastaryn sypyra utqan otandasymyz fınalda Parsy eliniń pehlevany Sharıatı Nıa Danıalmen ábden tiresti. Uzaq ýaqyt boıy ırandyq 3:1 esebimen alda kele jatty. Ońtaıly sátte óziniń oń jambasyna keletin ádisti sátti oryndaǵan Kamıl 6:3 esebimen tarazy basyn eńserip áketti. Sonda da Sharıatı jeńisten kúderin úzbeı, sońyna deıin aıqasty. Aqyry esep teńesti – 6:6. Báseke dál osylaı aıaqtaldy. Osy oraıda, alǵan upaıdyń sapasy eskerilip, jeńis Kýrýglıevtiń enshisine jazyldy.
Grek-rım kúresi sheberleri arasynan Álimhan Syzdyqov erledi. 130 kg salmaqta kúsh synasqan qazaqtyń nar tulǵaly azamaty jarysty basynan aıaǵyna deıin bir demmen ótkizdi. Buryn onyń jıi sharshap qalatynyn baıqaıtyn edik. Bul joly múldem basqa Álimhandy kórdik. Sheshýshi tusta ırandyq Mehdı Kalantarıdi 5:1 esebimen qapy qaldyrǵan Bısolt Desıevtiń shákirti álem chempıony atandy.
Sondaı-aq Aıdos Sultanǵalı (60 kg, grek-rım kúresi), Rústem Myrzaǵalıev (86 kg, erkin kúres), Svetlana Akıncheva (50 kg, áıelder kúresi), Marına Sedneva (55 kg, áıelder kúresi) qola medaldy ıelendi. Nátıjesinde, 76 upaı jıǵan elimizdiń quramasy jalpy komandalyq esepte besinshi oryndy ıelendi. Aldymyzda – Reseı (175 upaı), Iran (161), Armenııa (157), Túrkııa (141).
Kúres federasııasynyń vıse-prezıdenti Dáýren Jabasovtyń aıtýynsha, buǵan deıingi áskerılerdiń álem chempıonatynda jerlesterimiz dál mundaı zor tabysqa qol jetkizgen emes. Bási joǵary saıysta 3 altyn, 4 qola medal ıelenýimiz otandyq balýandarymyzdyń durys baǵytta ekenin ańǵartady.
