- Japonııanyń Hatınohe qalasynda konkıden «Tórt qurlyq birinshiligi» aıaqtaldy. Osy jarystyń komandalyq saıysynda bas júldeni oljalaǵan Qytaı quramasy sapynda qazaq qyzy Aqnar Ardaq óner kórsetti. Ekinshi, úshinshi oryndardy Japonııa, Ońtústik Koreıanyń konkıshileri ıelendi.
- Semserlesýden Kanadanyń Vankýver qalasynda jalaýy jelbiregen Álem kýboginiń kezeńdik saıysynda elimizdiń shpagashylary qola medaldi enshiledi. Úshinshi orynǵa tartysta jerlesterimiz Fransııadan 35:34 esebimen basym tústi. Bul básekede el namysyn Rýslan Qurbanov, Elmır Álimjanov, Vadım Sharlaımov, Erlik Sertaı qorǵady. Majarstan men Japonııa quramalary arasynda ótken fınaldyq aıqas qart qurlyq ókilderiniń paıdasyna sheshildi.
- Tennısshilerdiń álemdik reıtıngi qaıta jańartyldy. WTA tiziminde Elena Rybakına altynshy orynda. Ol Arına Sobolenko (Belarýs), Iga Shventek (Polsha), Koko Gaýf (AQSh), Jasmın Paolını (Italııa), Sınven Chjennen (Qytaı) keıin ornalasqan. ATR reıtınginde Iаnnık Sınnerdiń (Italııa) ózgelerden kóshi ilgeri. Ony Aleksandr Zverev (Germanııa), Karlos Alkaras (Ispanııa), Teılor Frıs (AQSh), Danııl Medvedev (Reseı) ókshelep keledi. Otandastarymyz arasynan Aleksandr Býblıktiń ǵana aıaqalysy táýir. Ol 33-orynda.
- 13-15 jeltoqsan aralyǵynda Norvegııada ardagerler men qazirgi ústel tennısiniń álem juldyzdarynyń qatysýymen alǵashqy Valdner kýbogi ótedi. Azııa quramasynyń namysyn Ma Long, Chen Men, Djang Výdjın, Lım Djonhýn, Shın Iýbın, Manıka Batramen birge elimizdiń birinshi raketkasy Kırıll Gerasımenko qorǵaıdy. Sondaı-aq dodada Iаn-Ýve Valdner, Trýls Moregard, Dmıtrıı Ovcharov, Ýgo Kalderano, Adrıana Dıas, Bernadet Sıoch syndy dúldúlderdiń de ónerin tamashalaımyz.
- Taıaý kúnderi frıstaıl-mogýldan Fınlıandııanyń Rýka qalasynda tusaýy kesiletin Álem kýboginiń kezeńdik saıysynda Iýlııa Galysheva, Pavel Kolmakov, Anastasııa Gorodko, Aıaýlym Ámirenova, Anton Bondarev, Fıodor Býgakov baq synaıdy.
- Tanymal aralas jekpe-jek sheberi, otandyq «Naızanyń» chempıony Dıas Erenǵaıypov óziniń kelesi kezdesýin 13 jeltoqsanda Bahreınde ótkizedi. Jergilikti BRAVE promoýsheni uıymdastyrǵaly otyrǵan jarysta qandasymyz brazılııalyq Marsıano Fereıramen (12-2) aıqasady.
- Almatynyń «Qaırat» fýtzal klýby Horvatııaǵa attanyp ketti. Sol jaqta olar ÝEFA Chempıondar lıgasynyń elıtalyq kezeńindegi básekelerge qatysady. V tobynda oınaıtyn jerlesterimiz «Olmıssým» (Horvatııa), «Etýal» (Fransııa), «Dınamo» (Zagreb, Horvatııa) klýbtarymen kúsh synasady. Bul básekeler 26 qarasha – 1 jeltoqsan aralyǵynda ótedi.
- Tennısten Devıs kýboginiń jeńimpazy anyqtaldy. Fınalda Italııa men Nıderland quramalary kúsh synasty. Jartylaı fınalda Apennın túbeginiń túlekteri Aýstralııadan aılasyn asyrsa, qyzǵaldaqtar eliniń ókilderi Germanııany jolynan yǵystyrdy. Sheshýshi saıysta baǵy janǵan ıtalııalyqtar bas júldeni oljalady. Jeńimpaz komandanyń sapynda Iаnnık Sınner, Lorenso Mýzettı, Andrea Vavassorı, Sımone Bolellı, Matteo Berrettını syndy sańlaqtar oınady.
