Petropavlda PIK tóraıymy aǵashtardy otap tastaǵan

PETROPAVL. 30 sáýir.  Oblys ortalyǵyndaǵy kópqabatty úılerdiń birinde páter ıeleri kooperatıviniń tóraıymy gazgol qondyrǵysynyń dál  túbinen avtoturaq salý maqsatymen aýladaǵy aǵashtardy tamyrymen juldyryp, balalar oınaıtyn alańqaıdy  shetke ysyryp tastaǵan. Bul týraly egemen tilshisi habarlady. Zańsyzdyqqa qarsy óre túregelgen turǵyndar tóraıymdy jaǵadan alyp, julyp jep qoıa jazdady. Tártip saqshylary ara túspegende istiń aıaǵy nasyrǵa shabýy ábden múmkin edi. Qalalyq ákimdik qyzmetkerleri  qos tarapty  mámilege keltirýge tyrysqanymen, odan eshteńe ónbedi. «Osy aýmaqta aǵashtar  jaıqala ósip, kósheniń sánin keltirip turatyn. Qazir biri de joq. PIK  tóraıymy  avtoturaq salamyn degen jeleýmen túp tamyrymen qurtqan. Aýlada onsyz da eki kólik turaǵy  bar. Erteń gaz jarylsa, kim jaýap beredi?»–dep ashýǵa býlyǵyp, júzderi qabarǵan turǵyndar ólispeı berispeýge bekingen syńaıly. Ákimdiktegiler bolsa  daýǵa aralasýdan  bastaryn ala qashty. О́ıtkeni, olardyń  aıtýlaryna qaraǵanda,  aýladaǵy jer tolyǵymen turǵyndardyń ortaq menshiginde kórinedi. Qalalyq jer qatynastary bóliminiń sektor meńgerýshisi Serik Nurmaǵambetov «bul jer telimi  ákimniń sheshiminen 7 jyl buryn  páter ıeleri kooperatıviniń  menshigine berilgen. Sondyqtan qandaı nysan turǵyzý kerek ekenin turǵyndar ǵana sheshýge quqyly. Ol úshin  kemi  jartysynan astamynyń  kelisimi kerek»,– degen túsinikteme berdi. Sóıtse, turǵyndar  PIK jınalysyna qatyspaq  túgil máseleden múldem  beıhabar bolyp shyqqan. Bul jerde avtoturaq turǵyzylatynyn aǵashtar  kesile bastaǵanda ǵana bilgen. Quqyq qorǵaý organdary zań normalaryn aıaqqa basqan PIK tóraıymy  qylmystyq jaýapkershilikke tartylýy múmkin ekenin jasyrmaıdy. О́mir Esqalı. Derek: KTK telearnasy. Sýret: egemen.kz